Пайк

ХАБАРҲО

Ду дуруғи директори бозори Восеъ

Таҷрибаи бозорсӯзии панҷсоли ахир дар кишвар гувоҳӣ медиҳад, ки ҳанӯз ҳам дар аксари бозору марказҳои савдо шакл нагирифтааст ё тартиботи дохилӣ ҷорӣ нагаштааст. Бозори ҷамъияти матлуботи ноҳияи Восеъ низ қисман дар ҳолати нохуби санитарӣ қарор дорад. Ин ҳам дар ҳолест, ки бештари тоҷирони  ин бозор роҳравҳоро банд кардаанд, ки на мошини оташхомӯшкунӣ даромада метавонад на чизи дигар.

Искандаршо Раҳмонов, сардори бозори ҷамъияти матлуботи ноҳияи Восеъ дар сӯҳбат ба “Пайк” гуфт, ки “Дар бозор 120 нафар соҳибкор фаъолият доранд. Барои тоҷирон бошад барои аз канори роҳ дур рафтан мо дар дохили бозор ҷойҳои нав таъсис додаем, вале қисме аз соҳибкорон то ҳол ба ҷойҳои худ нагузаштаанд, мо кушиш ба харҷ медиҳем то ҳамаи онҳо ба дохили бозор дароянд. Дар идомаи сӯҳбат иброз дошт: “Мо бо идораи комуналии ноҳия шартнома дорем, ҳар моҳ барои кашонидани партовҳои партовгоҳи бозор 450 сомонӣ пардохт мекунем”.

Ин дар ҳолест, ки партовгоҳи бозор пуропури партов буду буи ғализи он бозорро фарогир аст. Аз ҳама бадтарин ин буд, ки дар ҳар тарафи партовгоҳ хонаҳои баландошёна ҷойгир буд, Сабаби набурдани партовҳоро аз ҷаноби раис пурсон шудем, гуфт: “маблағро сари вақт пардохт менамоем, вале кормандони Корхонаи фаръии давлатии ноҳия партовҳоро намебаранд, гарчанде чандин маротиба ба онҳо занг зада хоҳиш намудем, онҳо бошанд як сухан доштанд- техникаҳоямон вайрон аст.”

Дурӯғи якуми раис

Роҷеъ ба масъалаи он ки директори бозори ноҳияи Восеъ Искандаршо Раҳмонов гуфта буд, ки 120 адад соҳибкор дар бозор ба тиҷорат машғуланд, вале ба ҳисоби мо дар бозор на 120 адад, балки 163 адад дукону мағозаҳо вуҷуд доранд, пас худ қазоват намо хонанда, ин оё пинҳон кардани андоз нест ё маблағи андоз ва чеки бозори ин 43 адад дукону мағозаҳо ҷайби раиси бозор ва ё сардори нозироти андозро пур мекарда бошад?

Дар ин масъала хостем бо сардори нозироти андози ноҳияи Восеъ Файзуллозода Хайрулло оиди андозсупории бозор сӯҳбате дошта бошем, дар мавриди он, ки шумораи андозсупорандагон дар бозор чӣ қадар аст ва барои надоштани мошинаи хазинавӣ чанд нафар аз соҳибкорони бозор огоҳнома ва нисбати чанд нафари дигари ин бозор санадҳо тартиб дода шудааст? Вале сардори нозирот як сухан дошт: ҳамаи ин сирри андозсупоранда ва андоз мебошад наметавонем, ки ба шумо гӯем дар бозор чанд нафар андозсупоранда аст. Гузашта аз ин дар бозори мазкур мошинаи назорати хазинавӣ тамоман ба чашм намерасид. Ин ҳам дар ҳолест, ки кумитаи андози кишвар корро дар ин самт пурзур карда, рӯз то рӯз санҷишҳо дар ин самт идома доранд. Худи ҳамин ноҳия бо машаќќати зиёд андозро базӯр то 100% мерасонад. Дар дигар гӯшаҳои минтаќа тољирон то андозае бо мошинҳои мазкур таъминанд. Ҳатто дар Кӯлоб хурдтарин тоҷирон низ ба ин намуди таҷҳизот таъмин шудаанд. Дар ин бора ба сардори нозироти андози ноҳия гуфтанием, ки агар надодани интервю ба хабарнигор сирри шумо бошад, пас ин сирро раиси бозор ҳарчанд дӯруғ ҳам бошад ба мо ошкор кард, гуфт, ки дар бозор 120 нафар андозсупоранда мебошад.

Дар ҳамин ҳол бояд гуфт, ки пинҳон кардани шумораи ҷойҳои савдо ва бо ҳамин роҳ гурез аз пардохти андоз амали бесобиқа нест. Соли гузашта айнан бо ҳамин масъала бозори “Саховат”и Кӯлобро ёдрас карда будем, ки роҳбарияти бозор гуфта буд дар бозор 250 нафар ба тиҷорат машғуланд, вале тадқиқоти мо собит сохт, ки на 250 нафар, балки аз 300 зиёд аст. Дар ҳақиқат, ҳамон вақт кормандони нозироти андоз рафта диданд, ҳақ ба ҷониби хабарнигор буд, ин маротиба ҳам аҳвол дар ноҳияи Восеъ чунин аст.

Мӯҳтарам Файзуллозода, ҳангоме, ки сухан сари андозу андозсупоранда равад обирӯйи давлату ҳукумат рӯйи кор аст. Инро набояд фаромӯш кард!  Оё пинҳон намудани андозсупоранда ин худ чӣ маъно дорад?

Дуруғи дуюми раис

Суоли дигар дар мавриди тоза накардани атрофи бозор буд, ки раис гуфт, мо ҳар моҳ маблағи корхонаи комуналиро месупорем, аммо онҳо партовҳоро намебаранд.

Роҷеъ ба ин масъала раиси Корхонаи комуналӣ-и ноҳия дар сӯҳбат бо хабарнигори “Пайк” чунин гуфт:  “Дар давоми соли 2016 бозори ноҳия бо мо тамоман шартнома набаста буд, имсол бошад дар моҳи май  баъди чандин маротиба рафтани кормандони мо ба ин марказ як шартнома бастанд, ки он ҳам бошад 250 сомониро ташкил медиҳад. Мо дар давоми соли равон танҳо як мартиба партовҳоро кашондаем. Дар мавриди он, ки гуё техникаҳои мо вайронанд, дурӯғи маҳз мебошад. Ҳоло 4 адад техникаҳои мо дар ҳолати хуби корӣ қарор доранд. Барои “квитансияҳое”, ки мо ба масъулини бозор додаем ҳаминро бояд гуфт, ки онҳо барои тоза намудани ҳоҷатхонаи бозор мебошад. дар 1 моҳ барои ин намуди хизматрасонӣ 350 сомонӣ муайян шудааст. Онҳо бошанд ҳатто ҳамин маблағро ба пуррагӣ намесупоранд. Дар давоми сол 3 адад "квитансияҳо" ба масъулини бозор дода шудааст, ҳамон ҳам бошад сари вақт кормандони комуниалӣ корҳои заруриро анҷом додаанд. Дар охир ҳаминро гуфтаниам, ки дар давоми 8 моҳ танҳо як маротиба пули кашондани партовҳоро пардохт намудаанд. Чандин  маротиба ба мақомотҳои дахлдор мактубҳо дар бораи шартнома надоштан бо корхонаи комуналӣ ирсол карда будем",-- гуфт ҳамсӯҳбатамон директори идораи комуналӣ Эмом Қараев.

Ҳоло бошад бо кӯшиши шабонарӯзии мақомотҳои низомӣ саҳни пеши бозори “Саховат” кушода шуда ин мушкилот сари бозори Восеъ омадааст. Пас, худ қазоват намо хонанда, бо ин ҳама чӣ гуна наметавон гуфт, ки бозори Восеъ бадтар аз Кӯлоб нест. Нигаронкунанда ва боиси таассуф аст, ки маҳз ҷиҳати саҳлангории бозордорон ду моҳи пеш ду бозори бузурги ноҳияи Фархор батамом сухта хокистар шуд.

Муҳаммади Мусавӣ, "Пайк"

 

 

 

Қонун догма нест, аммо маош догма шуд!

Ё худ то ба кай масъулин бо баҳонаи иваз кардани ҳуҷҷат даст ба ҷайби ниматиҳии мардум мехалонанд?

Дар ҳамин 10-соли ахир мо ҳиҷ нафаҳмидем, ки чӣ қавонине бофтаем, ки ба ҷуз ҷайби бе ин ҳам холии мардумро такидан, дигар ҳиҷ ҳадафи хубтаре дошта бошад. Шиносномаи хориҷиро 2 маротиб иваз кардем, аввал ранги кабуд дошт ва баъдан рангашро сиёҳ кардему муҳлати истифодаашро ба 10 сол тамдид намудем. Мардуми бечора, ба вежа муҳоҷирон, ки аксаран талабгори шиносномаи хориҷиянд, охирин пайсаи худро харҷ кардаву шиносномаашонро иваз карданд, аммо ҳамагӣ 2-3 соли муҳлати истифодаи шиносномаашон нагузашта буд, ки ба шиносномаи рақамӣ гузаштем. Ун замон дар оғоз гуфтанд, ки «шиносномаи плостикӣ барои унҳое, ки нав шиноснома гирифтаанд шарт нест, фақат вақте муҳлати истифодаашон гузашт, сипас маҷбуранд ба шакли нави шиноснома гузаранд». Аммо вақте чанд фисади мардум ба ун шиносномаҳо таъмин гашт, дигар мақомот ҳам ба таъбире «шерак» шудаву тасмим гирифтанд фаолияти шиносномаҳои кабудро комилан аз миён бардоранд, новобаста аз он, ки шаҳрвандон бо ун шиноснома дар кадом гӯшаи дунё машғули коранд ё шароити аз нав баргашт ба ватану тағири ҳамун коғазро доранд ё на!

Сертификати заминдориро иваз карданду ким-кадом як коғази навро ба ҷояш ҳукми қонунӣ доданд. Нарху навои ҳуҷҷатҳои мошинро боло бурданду сабабашро ҳам гуфтанд, ки «қонун догма нест». Аммо касе нагуфту гуфтан ҳам нахост, ки агар қонун догма нест пас маоши мардум чаро догма шуда?! Дар 1 сол ҳамагӣ 1 маротиб маоши кормандони давлатӣ чанд фоизак боло мераваду баробараш нархи бозору мағозаҳо осмонӣ мешаванд, ки ба ҳиҷ ваҷҳ зури ягон ниҳод ва ягон мақомдори сатҳи баланд ҳам ба контроли нарху навои бозор нарасиду намерасад ва инро мо солҳост шоҳидем, аммо бадтар аз ун ин аст, ки баъди як «оромӣ» дар ҷомеъа ҳатман кадом ниҳоди давлатие ба ҷайби мардум зери парчами «қонун догма нест» даст мехалонад! Навбат ба БДА ва масъулини макотибе расид, ки то ин рӯз ҳуҷҷати ронандагӣ ба фурӯш гузоштаанду мардумро бо таври порагирӣ соҳиби ҳуҷҷати ронандагӣ намудаанд ва инро дар охирин мулоқоти худ Президенти мамлакат, мӯҳтарам Эмомалӣ Раҳмон ҳам қатъан таъкид карду ишораҳои ошкор дошт, ки сабабҳои аксари садамаҳои нақлиётӣ ҳамун ронандагонеанд, ки саводи кофии ронандагӣ надоранд-яъне ҳуҷҷатро харидаанд! Вале баъди 2 рӯзи таъкидҳои Президент, мақомоти БДА ошкор ва бидуни ҳиҷ далел ва бидуни хиҷолат, эълон кард, ки «бояд ҳарчӣ зудтар ронандаҳои мо ҳуҷҷати ронандагияшонро, ки аллакай барои мақомоти мо куҳна шудаанд, ба ҳуҷҷати ронандагии шакли нави рақамӣ, яъне плостикӣ иваз кунанд, новобаста аз он, ки муҳлати истифодаи ҳуҷҷатҳояшон гузаштааст ё на». Яъне ба таъкиди масъулин, ҳатто агар ҳуҷҷати ронандагиятро ҳамагӣ 1-2-3-4-5 сол ҳам шуда бошад, бояд ивазаш кунӣ ва ҳатто агар 1 моҳ ҳам. Бар ивази 435 сомонӣ тибқи қонун!!! Ба назар мерасад, ки масъулини мо комилан вазифа, масъулият ва ҳатто ваколати худро фаромӯш кардаанд, ки тибқи қавонини байналмилалӣ, агар мардумро маҷбур ба тағири кадом ҳуҷҷате мекунӣ, аввалтар аз ҳама ин кор БОЯД РОЙГОН анҷом шавад ва баъдан агар ин кор маҷбурӣ нест, пас аз ингуна эълонҳо дар расонаҳо бояд даст кашид. Баъдан бояд гуфт, вақте қонун догма несту рушд мекунад, бояд ба назар гирифт, ки ҳуҷҷатҳои ронандагии нав, бигзор агар плостикӣ бошад ё алюминӣ ва ҳатто оҳаниву тиллоиӣ ҳам, ҳамагӣ ҳуҷҷате беш нест ва дар кадом кишварҳо ба кор меравад?! Шояд ҳуҷҷати ронандагии нав дар кадом кишвари хориҷ ба кор раваду этироф гардад, аммо дар ҳамин Русияи шарики стротегиятон, ки селаи ронандагони тоҷик ҳаминҷо машғули кори таксиянду мусофиркашиву дар ширкатҳо ба ҳайси ронанда кор мекунанд, ҳуҷҷати ронандагӣ на ун шартҳои «оҳанину плостикӣ», балки тибқи дигар шартҳо ба кор меравад ва мо инро ҳамарӯза шоҳидем. Дидему дида истодаем, ки Русия ошкор эълон кард, ки дигар бачаҳои муҳоҷир аз Осиё, ба вежа тоҷикон дар ширкатҳои мусофиркашӣ ё дигар ширкатҳо ба ҳайси ронанда танҳо дар ҳолате ба кор гирифта мешаванд, ки ҳуҷҷати ронандагии Русияро дошта бошанд! Шумо мефаҳмед, ин яъне чӣ? Яъне ҳуҷҷати ронандагие, ки дар Тоҷикистон ба мардум дода мешавад, ҳатто дар хоки ҳамин «шарики стротегӣ» ба кор намеравад куҷо расад ба кишварҳои ғарбӣ, ки масъулини мо ҳам дар эълонашон аз кадом конвенсияи Австрия мисол овардаанд!! Шумо масъулини мӯҳтарам киро фиреб медиҳед?!

Воқеан, боварӣ доред, ки дар зери ҳамун хабарҳое, ки бобати эълони тағири ҳуҷҷати ронандагиянд ҳатто 1 нафар беақл пайдо шуда бошад, ки ин найранги пулканиро дарк накарда бошад?! Дароед ба инет ва бубинед, ки ҷомеъа бо чӣ дағалие ин хабарро «пешвоз» гирифт!!!

Ин ҳама дар ҳоле, ки масъулин ҳатто таҳдид доштанд, ки «дар сурати дар наздиктарин фурсат иваз накардани ҳуҷҷати ронандагӣ, мошинҳои мардумро ба ҷаримагоҳ мебарем»! Ин чӣ тарзи тафаккуру чӣ шакли эълондиҳисту чӣ роҳи навкорӣ, ки шумо масъулини мӯҳтарам ба кор мебаред? То кай Давлатро назди мардум мисли як аждаҳо муаррифӣ мекунед, ки «ҳар гоҳ хоҳад сари касеро мехӯрад»? Ин таъкиди масъулинро ҷомеъа бидуни шакку шубҳа як таҳдиди ошкор ба ронандаҳо қабул кард, ки БДА мардумро аз кормандони радарбадасташ метарсонад, ки сари ҳар гардиш ба таъбири Ҷамшеди Ҳалим мислиТангем «яке пайдо» шудаву охирин пулатро кашида мегиранд. Бе ин ҳам нозирони роҳи мо аз фарҳанги муошират бо мардум ва масъулияти касбиву тарзи бархурди муаддабона бо ронанда бархурдор нестанд ва борҳо дағаливу бетартибиҳои рухдода бо гуноҳи нозирони роҳро ҷомеъа наворбардорӣ кардаву дар инет гузоштаанд, ки ҳамагӣ шоҳидем, пас шарт аст фишори дигаре алайҳи ронандагон кашф карду хашми мардумро барангехт?! Шумо ҳам хуб медонед, ки 435 сомоние, ки бар ивази 1 коғазе, ки ба ҷуз дар Тоҷикистон дигар дар ягон кишвари олам, ба вежа дар Русия ба кор намеравад, маоши моҳонаи аксари мардум аст, пас чаро инқадар бераҳмонаву дағалона бо такя бо қонун ба ҷайби мардум даст мезанед? Кӣ ба ин иҷоза дода? БДА!?

Шахсан ман ба ҳиҷ ваҷҳ зарурати тағири ҳуҷҷати ронандагиямро намебинам! Зеро далелҳое, ки масъулини БДА дар расонаҳо пешкаш карданд, ҳамагӣ бӯи пулкоркунӣ дошту халос. Ҳоло БДА-и Тоҷикистон аз ФМС-и Русия ҳиҷ фарқе надорад, ки ҳарду ҳам ошкоро бачаҳояшонро дар кучаҳо мепартоянд, то аз муҳоҷирон пора гиранд ё муҳоҷиронро маҷбур кунанд, ки ба идораҳои ҳадамотҳои мазкур рафтаву ҳуҷҷатҳое созанд, ки воқеан ба касе даркор нест. Аммо ФМС ку ҳадиаққал муҳоҷиринро ба кор даъват мекунад, БДА-и мо чӣ? Ҳиччӣ!

Натанҳо БДА, балкӣ аксари ниҳодҳои ҳуҷҷатдиҳандаи мо тавони кор пешниҳод карданро надоранд. Моро дипломҳоямон ҳам ба кор намераванду унвонҳоямон ҳам, куҷо расад ба ҳуҷҷати ронандагиямон. Лек ҳарчӣ ҳаст диплому унвонҳо бастагӣ доранд ба муносибатҳои давлатӣ ва масъулияти Ҳукумати кишвар аст, ҳуҷҷати ронандагӣ чӣ? То кай худатонро мавриди масхараи хориҷиён ва мухотаби хашми мардум қарор медиҳед? Айб нест? 435 сомон ин ҳоло оғози кор асту ба таври расмӣ, аммо дар дохили нуқтаҳои ивазкунии ҳуҷҷати ронандагӣ чӣ мегузарад, мо бештар аз шумо медонему дар роҳҳо чӣ шакли бархурди нозирони роҳ бо ронанда, инро ҳам ҳамагӣ медонаду борҳо шоҳид шудааст. Ҳукумати Тоҷикистонро мебояд сари ин мушкил таҷдиди назар кардаву дар наздиктарин фурсат пеши роҳи ин мушкилсозиро гирад, вагарна мардуми бе ин ҳам ноумед аз фардои хубро ноумедтар хоҳад карду худро боз ҳам мавриди интиқодҳои созмонҳои хориҷӣ қарор хоҳад дод, ки на ба фоидаи миллат асту на бар нафъи давлат. Мо мушкилро расондем, дигар касе мехонад, механдад, мегиряд, ё ба кораш идома медиҳад, моро коре нест. Бе ин ҳам ба фасодзадагии ниҳодҳои расмӣ дар Тоҷикистон ҷомеъаи байналмилалӣ ҳам мутмаин аст, куҷо расад ба мо сокинонаш, ки ҳамарӯза ин ҳамаро мебинему шоҳидему қурбони воқеот. Воқеан, агар тасмиматон ҷиддисту ба таъбири БДА «хостори «дар наздиктарин фурсат» тағири кулли ҳуҷҷатҳои ронандагии мардумед, пас инро ба таври ройгон анҷом диҳед, агар дар фикри боз ҳам харобтар кардани иқтисоди мардумед, дигар шумо медонеду инсофатон. Гури шумо ҷудову аз мо ҳам ҷудову дуртарак…

Хосса кас намедонад ҳуҷҷатҳои ба тозагӣ ивазшуда боз чанд сол ё моҳ кор медиҳанд, шояд то пулфор шудани масъулин…?

Шарифхони Тағоймурод, Москава

 

 

“Амонатбонк” ба амонат хиёнат мекунад?

Шумори зиёди нафақагирон дар шаҳри Кӯлоб бо иллати ба таъхир афтодани пули нафақаашон изҳори норозигӣ доранд. Ин барои бори аввал нест, ки падарону модарони яко яки мо бо сабабҳои сањлангории масъулини “Амонатбонк” нафақаашонро намегиранд. Дар њоле, ки ҳар рӯз тавассути ТВ шабакаҳо таърифу тавсифи модар ба ављи аъло мерасад,  дар Кӯлоб, модарони пиронсол дар гармии то 40 дараҷа зери офтоби сўзон дар интизори нафақа нишастанд.

Роҷеъ ба ин масъала сардори Раёсати Агентии суғуртаи иҷтимоӣ ва нафақаи минтақаи Кӯлоб Қурбонзода Ҷурабек дар сӯҳбат "Пайк" иброз дошт, танҳо дар худи шаҳри Кӯлоб маблағи масрафшуда барои нафақахӯрон ‎4868593,56 сомонӣ мебошад, ки ин маблағи кам нест, бо ҳамин сабаб мо наметавонем, ки маблағи нафақаро сари вақт пардохт намоем. Моҳонапӯлии нафақахурон бошад дар моҳи июл пурра гузаронида шудааст. Гарчанде, ки иҷроиши андози ғайри бюҷетӣ њамагӣ  87,5% ро ташкил мекард мо аз ноҳияҳои Ш.Шоҳин ва дигар ноҳияҳо маблағи нафақахӯрони Кӯлобро  пурра гузаронидем.

Мувофиқ ба маълумоти сардори Раёсати молияи шаҳри Кӯлоб Одинаев Раҳмон андози иҷроиши бюҷет аз ҳисоби тамоми идораву муассисаҳои буҷетӣ 113% -ро ташкил медиҳад, ки барзиёди нақша мебошад.

Боз “Амонатбонк ” гунаҳкор

Ҳамагӣ чанд моҳ қабл мо оиди нагирифтани пули омӯзгорон бо сабабҳои гуногуни “Амонатбонк ” маводе ба чоп додем, ки бо сабаби набудани маблағ мардум маош нагирифта буданд.  Ҳаминак боз ҳамон мушкилотҳоро масъулини бонк ба сари пирону барҷомондагон оварда истодаанд. Аз ин моҳ 10 рӯз сипарӣ шуда бошад ҳам то ҳол нафақахӯрон ҳамон маблағи ночизи худро аз “Амонатбонк” гирифта наметавонанд.

Перумони ин масъала хостем бо роҳбарияти “Амонатбонк” Самариддинзода Муҳриддин суҳбате дошта бошем, аммо ин ҷанобашон хело ҳам бо карру фар буд ва чунин гуфт: “ма ҳичкасда интервю намедиҳам чун, ки моро роҳбарият иҷозат намедиҳад , мо маркази акои Сайфулло дорем, хадамоти реклама барои додани интервю мо бе иҷозати ӯ коре карда наметавонем, гуфт Самариддинзода М. Бо яке аз зердастонаш супориш дод, ки маро ба утоқи дигар баранд ва аз акои Сайфулло иҷозат гиран то ба мо сабаби то ба имрӯз нагирифтани нафақаро шарҳ диҳанд, лекин ҳайҳот, Сайфулло кайҳо телефонашро хомӯш карда буд. Бо ҳамин мо аз гирифтани маълумот танқисӣ кашидем ва бо сабаби хомуш будани Самариддинзода мо натавонистем ба ту маълумоте пешкаш намоем хонанда. Танҳо ҳаминро гуфтанием, ки аз зиёд будани муйсафедону кампирон ба дари “Амонатбонк” даромадан хело мушкил буд.

Хоҷаев Мадислом, яке аз нафақахӯрони шаҳри Кӯлоб дар суҳбат бо “Пайк” чунин гуфт: "Мо аз 5-уми моҳ то инҷониб дар назди дари бонк мебошем, масъулин бошанд мегўянд имрӯз биёед фардо биёед мардумро саргардон карда гаштанд".

Пас суоле ба мудири сарраёсати “Амонатбонки” ҷумҳурист, ки қонун дар бораи надодани интервю дар бораи кормандони бонк кай ба тавсиб расидааст ва оё ин кори зертобеини шумо хиёнат ба бонк ва худи ҳукумату нафақахӯрон нест?

Муҳаммади Мусавӣ, "Пайк"

Мудири Бонки миллӣ боз аз нишаст гурехт!

Таъмин намудани пул дар бонкҳо ин вазифаи аввалиндараҷаи бонки миллӣ мебошад. Имрӯзҳо бисёр ба чашм мерасад, ки сокинон дар назди бонкҳои минтақа аз субҳ то шом навбат мепоянд, билохира аз набудани маблағ боз ночор роҳ сӯи хона мегиранд. Чунин ҳолатро қабл аз иди Рамазон ҳам мушоҳида кардан мумкин буд. Аммо директори бонки миллӣ дар минтақаи Кӯлоб Абдулваҳҳобов Сайфулло парвое надораду дар фикри ба пуррагӣ гирифтани вазифаи мудири бонк мебошад.

Абдулваҳҳобов қонун мешиканад.

Соли гузашта дар ҳамин  маврид дар ҳафтавори «Пайк» ду мақола зери унвони «4 дурӯғи бонки миллӣ» ва «дуруғи 5-уми бонки миллӣ» ба нашр расида буд, ки саросар аз дуруғҳои роҳбарияти ин бонк қисса мекарданд, ки ин ҷаноб дидаву дониста муқобили фармону қонунҳое, ки Пешвои миллат дар зерашон имзо гузоштааст бепарвогӣ зоҳир мекунад. Ба ягон мақолаи танқидӣ вокуниш наменависад.

Ин бор ҳам дар нишасти матбуотӣ иштирок накард. Ин барои бори аввал нест, ки роҳбарияти бонки миллӣ дар минтақаи Кӯлоб Абдулваҳҳобов Сайфулло дар нишастҳои матбуотӣ ширкат намеварзад. Ҳар гоҳ, ки нишасти матбуотӣ наздик шуд зуд ба рухсатӣ мебарояд. Кас намедонад ин ҳама рухсатиҳоро ба ӯ кӣ медиҳад!?

13 ҳолати коррупсионӣ дар бонк

Ҳамоно бармегардем сари масъалаи нишасти матбуотӣ. Дар нишаст гуфта шуд, ки имсол 13 ҳолати корупсионӣ дар бонкҳои аз тарафи Агентии мубориза бар зидди фассод дар  минтақа ба қайд гирифта шудааст, ки ин нишондод нисбати соли гузашта зиёд аст. Аз ҳама риққатовараш ин буд, ки дар давоми ин шашмоҳа аз тарафи худи бонки миллӣ 68 маротиба санҷишҳо гузаронида шуда буд ва ягон ҳолати коррупсионӣ аз тарафи масъулини бонки миллӣ ошкор нашуд, пас ин бемасъулиятии ин масъулинро намефаҳмонад, ё ҳама санҷишҳо дуруғ буд, муҳтарам Абдулваҳҳобов, ки дар 68 санҷиш ҳадди ақал як амали корупсионӣ ошкор карда натавонистед?!  Дигар ниҳод бошад баякбор 68 ҳолат ошкор кард.

Мошинҳои  хизматии бонк дар хизмати Абдулваҳҳобов

Пас аз ба анҷом расидани нишасти матбуотӣ як нафар аз корманди бонки миллӣ, ки хоҳиш кард номаш ифшо нашавад (дар ҳолати истисноӣ исмаш гуфта мешавад) омада чунин гуфт: Ҳоло дар бонк 4 мошини хизматӣ бо ном дар хидмати кормандон мебошанд, вале афсус, ки мудири бонк 2 ададашро дар гараж қулф карда ба рухсатии меҳнатӣ рафтааст. 2 адади дигар бошад дар ихтиёри шуъбаи ҳамлу нақд ба пулкашонӣ машғуланд, як муовин ва дигар кормандон аз хидмати ин мошинҳо дур мондаанд.

Хуллас, мудири бонк чӣ гунае, ки мехостааст дар дохили ин бонк ҳукмронӣ мекардааст.

«Дар моҳи июл мудир ба рухсатӣ баромад, мо ба роҳбар гуфтем,ки муҳтарам, дар ин моҳ нишасти матбуотӣ бо хабарнигорон будааст, хуб мешуд, ки ин маҷлисро мегузаронидед, баъд ба рухсатӣ мерафтед. Мудир бошад худатон гузаронед»,- гуфт ҳамсӯҳбати мо.

Об аз боло лой шудааст

Аз ҳама аҷиб ва қонуншикании Абдулваҳҳобов ва мудири бонки миллии Тоҷикистон дар он аст, ки Абдулваҳҳобов ду сол боз ба ҳайси иҷрокунандаи вазифаи мудири бонки миллӣ дар минтақаи Кӯлоб фаъолият карда истодааст. Ба фикри мо худи у низ аз иҷрокунанда буданаш шарм медорад, ки дар пушти дараш чунин навиштааст: МУДИРИ ШУЪБАИ БОНКИ

МИЛЛӢ АБДУЛВАҲҲОБОВ САЙФУЛЛО НАЗРУЛЛО.

Дар охир суоле ба мудири бонки миллии Тоҷикистон дорем-ОЁ масъул бояд чанд моҳ ИҶРОКУНАНДАИ ВАЗИФА боқӣ монад?  Ҳоло, ки иҷрокунанда аст, ин маънии онро дорад, ки бонк таи ду соли ахир бе мудир фаолият кардааст. Ҳоло боз байни мардум овозаҳое паҳн гаштааст, ки Абдулваҳҳобов корхонаи хусусии суратгирӣ ҳатто  ба номи худ дорад, ки ин амал  амали коррупсионӣ аст.  Қавонини ҷории кишвар ба ин иҷозат намедиҳад.

Муҳаммади Мӯсавӣ, "Пайк"

Миқдори зиёди фурӯши арақи худсохт ошкор ва пешгири гардид

Ҳангоми гузаронидани чорабиниҳои оперативӣ - ҷустуҷӯӣ аз ҷониби кормандони шуъбаи мубориза бар зидди ҳуқуқвайронкуниҳои гумрукии Раёсати минтақавии гумрукӣ дар шаҳри Душанбе шаҳрванди П. А. соли таваллудаш 1984, истиқоматкунандаи шаҳри Душанбе, ҳангоми ба фурӯш гузоштани арақи худсохт дастгир гардид.

Шаҳрванд П. А. бо мақсади ба даст овардани даромади муфт ва фиреб намудани истеъмолкунандагон дар мавриди хосияти истеъмолкунӣ ё сифати маҳсулот 10 қутти машруботҳои спиртии тамғаи «Шоҳона» навъи «Хлебная» ба миқдори 52 адад ва «Платинум» ба миқдори 62 адад, ҷамъ 114 адад бо ғунҷоиши як адад шиша 0,5 литр, ки бо тариқи худсохт тайёр шуда буданд аз манзили муваққатан истиқомат менамудааш, воқеъ дар маҳаллаи Ховарони шаҳри Душанбе ба бордони нақлиёти тамғаи «Мерседес Бенс», рақамҳои қайди давлатиаш ТJ 25 - 66 СР 01 ҷойгир намуда, ба маҳаллаи Воданасоси шаҳри Душанбе интиқол медиҳад. Шаҳрванд П. А. арзиши як адад арақи тамғаи «Шоҳона Хлебная» - ро 14 сомонӣ ва арзиши як адад арақи тамғаи «Шохона Платинум» - ро 20 сомонӣ, ҷамъ 1 ҳазору 968 сомонӣ нархгузори намудааст.

Тибқи мактуби ҶДММ «Шоҳона» арзиши 1 адад арақи тамғаи «Шоҳона Платинум» ғунҷоишаш 0,5 литр 25 сомонӣ ва 1 адад арақи тамғаи «Шоҳона Хлебная» ғунҷоишаш 0,5 литр 15 сомонӣ, ҷамъ 2 ҳазору 330 сомониро ташкил медиҳанд, ки ба таври худсоз бидуни технологияҳои истеҳсоли сохта шудаанд ва ба ҶДММ «Шоҳона» дахл надоранд.

Мувофиқи хулосаи Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон, санҷиши физико - кимиёвии намунаҳои арақҳои тамғаҳои «Шоҳона Платинум», «Шоҳона Хлебная» ба талаботи ҳуҷҷати меъёрии арақҳо ва арақҳои махсус «Шартҳои техникӣ» мутобиқ нестанд.

Мувофиқи хулосаи Хадамоти назорати давлатии санитарию - эпидемиологии Ҷумҳурии Тоҷикистон, маҳсулотҳои озмоишуда, аз рӯи нишондодҳои намуди зоҳирӣ, қувватнокӣ ва дараҷаи ғизлати алдегит ба талаботи ҳуҷҷатҳои меъёри техникӣ мутобиқ набуда, истеъмоли чунин маҳсулот ба саломати зарар дорад. Аз рӯи ҳолати мазкур нисбати шаҳрванд П. А. ва дигарон бо моддаҳои 209 қисми 1 ва моддаи 294 қисми 2 – и банди «а» ва «б» Кодекси ҷиноятии Ҷумҳурии Тоҷикистон, парвандаи ҷиноятӣ оғоз карда шуда, ба прокуратураи шаҳри Душанбе ирсол карда шуд.

Маркази матбуоти Хадамоти гумруки назди Ҳукумати Ҷумҳурии Тоҷикистон

Ба ҷазои ҷинои кашидани намояндаи ҶДММ “Меҳр - 777” – барои қочоқ

Ҳангоми гузаронидани амалиёти гумрукӣ аз ҷониби кормандони Раёсати ташкили мубориза бар зидди ҳуқуқвайронкуниҳои гумрукии Хадамоти гумруки назди Ҳукумати Ҷумҳурии Тоҷикистон, дар Дидбонгоҳи гумрукии "Фотеҳобод"- и гумруки Мастчоҳи Раёсати минтақавии гумрукӣ дар вилояти Суғд, муайян карда шуд, ки шаҳрванд М. З. аз рӯи маслиҳати пешакӣ бо дигарон даст ба содир намудани ҷиноят задаанд, ки моҳияти он қочоқ, интиқоли мол ва ашёи дигар аз сарҳади гумрукии Ҷумҳурии Тоҷикистон бо истифодаи техникаи компютерӣ, иборат мебошад.

Шаҳрванд З.Н. дар асоси ваколатнома ҳамчун намояндаи ҶДММ "Меҳр - 777" баромад намуда, бо мақсади ба даст овардани даромади муфт, аз рӯи маслиҳати пешакӣ бо дигарон ба воситаи нақлиёти боркаши тамғаи "Волво" рақами қайди давлатиаш B 721 – SYN – 64 16 BD аз Ҷумҳурии Мардумии Чин, 35 номгӯйи молу маҳсулотҳои сохтмонӣ, конселярӣ, либосҳои мардонаю занона, сару либос ва бозичаҳои гуногуни кӯдакона ва дигар молҳои ниёзи мардумро бидуни барасмиётдарории гумрукӣ вориди Ҷумҳурии Тоҷикистон намудааст.

Тибқи маълумотномаи Шуъбаи ташхиси криминалистии РВКД - и ВКД - и Ҷумҳурии Тоҷикистон дар вилояти Суғд, муайян карда шуд, ки нақши мӯҳрҳои даврашакл ва нақши сиккаҳои росткунҷашакл дар рӯи варақаи ҳуҷҷатҳои рӯйхати номгӯйи мол гузошташуда, бо истифода аз воситаи нусхабардорӣ ва дастгоҳи чопии ранга гузошта шудаанд.

Мувофиқи маълумотномаи Раёсати батанзимдарории тарифию гумрукӣ ва назорати арзии Хадамоти гумруки назди Ҳукумати Ҷумҳурии Тоҷикистон муайян карда шуд, ки арзиши молу маҳсулотҳои тариқи қочоқ ворид намудаи шаҳрванд М. З. ва дигарон, маблағи умумии 464 ҳазору 594 сомонию 13 дирамро ташкил медиҳад, ки дар натиҷаи ин ҳаракатҳои қасдонаи онҳо ба буҷаи давлат ба миқдори калон зарари моддӣ расонида шудааст.

Оид ба ҳолати зерин нисбат ба намояндаи ҶДММ “Меҳр - 777” М. З. ва дигарон бо моддаи 289 қисми 2 ва 340 қисми 2 – и бандҳои «б, в» - и Кодекси ҷиноятии Ҷумҳурии Тоҷикистон, парвандаи ҷиноятӣ оғоз карда шуда, дар Прокуратураи вилояти Суғд мавриди тафтишот қарор дорад.



Маркази матбуоти Хадамоти гумруки назди Ҳукумати Ҷумҳурии Тоҷикистон

 

 

 

 

 

 

 

Дар роҳи Данғара-Кӯлоб-Дарвоз 12510 бех дарахт шинонида шуд

Дар асоси нақша дар шоҳроҳҳо ва талу теппаҳои атрофи онҳо дар маҷмуъ ба миқдори 35515 бех, аз ҷумла дар шоҳроҳҳои Душанбе-Ваҳдат-Саритош ба миқдори 4400бех, Данғара-Кӯлоб-Дарвоз 12510 бех, Душанбе-Турсунзода 1160 бех, Душанбе-Хуҷанд-Чаноқ 7745 бех, Қурғогтеппа-Қубодиён-Н.Хусрав 4500 бех ва Ваҳдат-Ёвон 3000 бех ниҳолҳои гуногуни писта, шулаш, зардолу, бодом, сузанбарг шинонида шуд. Инро Азизуллоҳ Исматзода рӯзи  25.07.2017  дар ҳисоботи шаш моҳаи аввали Агентии хоҷагии ҷангали назди Ҳукумати Ҷумҳурии Тоҷикистон қайд кард.

Дар идомаи нишасти хабарӣ Исматзода ёдовар шуданд, ки  бо кӯмаки моддии Бонки рушди Олмон (KFW) 688 гектор ҷангалзори нав ва дорои 744.4 ҳазор бех бунёд карда шуд.

Дар посух ба саволҳои пай дар пайи рӯзноманигорон директори Агентӣ чунин гуфт: Буридани дарахт ба мардум фоида намеорад дар ҳоле, ки ҳам ангиштсанг ҳаст ва ҳам гази моеъ.

Айни ҳол дар кишвар 3 мамнуъгоҳ   фаъолият дорад, вазъи мамнуъгоҳи   Бешаи Палангон дар давоми се соли охир муътадил аст. Аз тарафи коршиносони Юнеско мамнуъгоҳи   Бешаи Палангон нодиртарин мамнуъгоҳ   дар сайёра ҳисобида шудааст, гуфта шуд зимни нишаст.

Зувайдзода: Аз 2399 муроҷати шаҳрвандон 486 тоаш қабул шуд

Зувайдзода Маҳмасаид рӯзи 25.07.2017 дар нишасти матбуотии Мақомоти иҷроияи ҳокимияти давлатии шаҳри Душанбе гуфт: Ба дафтари мо 2399 шаҳрванд муроҷиат карданд, ки аз ин миқдор 486 муроҷиаташ қабул шудаанд.

Мо ният дорем, ки дар муддати  3 сол ҳамаи роҳҳоро аз таъмир барорем  дар мавриди таъмири роҳҳои шаҳри Душанбе Зувайдзода гуфт:

Инчунин дар вақти ҳисоботдиҳи Зувайдзода изҳор дошт: Дар шаш моҳи аввали соли 2017 бо мақсади татбиқи сиёсати давлатии ҷавонон, варзиш ва сайёҳӣ 449 чорабинӣ бо фарогирии 117 ҳазору 289 нафар баҳри рушди инкишофи тарбияи ҷисмонӣ ва варзиш, 243 чорабинӣ бо фарогирии 116 ҳазору 723 нафар ва дар сами сайёҳӣ 44 чорабинӣ бо фарогирии 8 ҳазору 160 нафар. Дар маҷмӯъ 736 чорабинӣ бо фарогирии 242 ҳазору 172 нафар гузаронида шуда, ки ин нишондод нисбати ҳамин давраи соли гузашта 297 чорабинӣ ва шумораи фарогирандагон 59 ҳазору 331 нафар зиёд мебошад.

Страница 2 из 4

Суроғаи мо:

Joomla ru