Пайк

ХАБАРҲО

ИҶТИМОЪ

Дар Кӯлоб реҷаи барқ чанд соат?

Дар ҳамин шабу рӯз дар баъзе аз маҳаллаҳои шаҳри Кӯлоб барқро ба муддатҳои номаълум хомӯш мекунанд. Байни мардум овозаҳо паҳн гаштааст, ки дар ҷумҳурӣ реҷаи барқ ҷорӣ шудааст. Агар чунин бошад барои аввалин маротиб аст, ки дар моҳи сентябр реҷа ҷорӣ мешавад. Ин ҳам дар ҳоле, ки шурӯъ аз зимистони соли гузашта реҷаи барқ батамом бардошта шуда буд. Ин иқдоми ҷавонмардонаи Пешвои миллат мардумро хеле дилгарм карда буд. Аммо чунин ба назар мерасад, ки дар баъзе аз навоҳӣ ин дилгармкунӣ ба табъи масъулини барқ нест. Дар маҳаллаҳои Чарм гарон, Нонбои поён, Суғдиён, Даминзода, Корвонгузари шаҳри Кӯлоб, масалан рӯзи гузашта 26 сентябр, барқ рӯзона ба муддати камаш 4 соат хомӯш буд, боз ин иқдом аз соати 24 шаб то соати 5 саҳар такрор шуд. Нуқтаҳои фурӯши сӯзишворӣ, бахусус гази моеъ, чаҳор соат бекор нишастанд ва ин боиси саргардонии ронандагони зиёд шуд.

Имрӯз 27 сентябр ҳам дар маҳаллаҳои мазкур ва баъзе маҳаллаҳои дигар ҳам барқ аз соати 12 то 16 -20 дақиқа хомӯш буд.

Қутбиддин Самиев, сармуҳандиси ҶСШК «Шабакаҳои Барқ»-и шаҳри Кӯлоб тариқи телефон ба саволҳои хабарнигори Пайк посух дода гуфт: «Реҷаи мазкур вобаста ба хомӯш кардани барқ ба муддати 4 соат дар як шабонарӯз бо супориши ҳукумати вилояти Хатлон дар ҳақиқат дар шаҳр ҷорӣ шудааст. Мақсад дар ҷараён будани корҳои таъмирӣ аст. Дар муддати тобистон «Шабакаҳои Барқ»-и шаҳри Кӯлоб бо сабаби сари вақт дастрас нашудани таҷҳизоти лозима аз ӯҳдаи таъмиру барқароркунии таҷҳизоти барқӣ набаромад. Таъмир ҳамагӣ 80 фоиз иҷро шуд.»

Ин ҳам дар ҳоле, ки ҳамвора таъмири хатҳои барқ ва зеристгоҳҳо тибқи ҳисоботи сардорони шабакаҳои барқи вақт дар муддати тобистон пурра ба анҷом расонида мешуд.

Имсол ҳам тобистон мунтазам дар шаҳр барқро  ба муддати 2-3 соат ба хотири таъмир хомӯш мекарданд. Аммо аҷиб аст, ки масъулини Шабакаҳои Барқи шаҳри Кӯлоб ноӯҳдабароии худро ба зиммаи ширкати «Барқи Тоҷик» ва ҳукумати вилоят бор карданӣ мешаванд.

Пайк

Соате пеш Фарзона худро оташ зад

Имрӯз 19 сентябр ҷисми сухтаи Фарзона  Ғуломоваи 26 сола, сокини н. Восеъ, ҷамоати Х.Раҷабов, деҳаи Пахтакорро аз хонаи шавҳараш ба беморхонаи вилоятии шаҳри Кӯлоб оварданд.

Ғуломова Гулдаста, апаи ҷабрдида дар сӯҳбат ба Пайк иброз дошт, ки "сӯбҳи имрӯз аз хонаи шавҳараш қисмати саҳар ба ман занг зада гуфтанд, ки омада мурдаатонро баред. Мо намедонем, ки чӣ гуна хоҳарам худашро оташ задааст. Сабаби асосии ин фоҳиа тӯҳмат задани ӯст. Зеро дар хонаи хушдоманаш гарданбанди заррин гум шуда буд ва аҳли оилаи шавҳараш ӯро гумонбар медонистанд».

Тибқи иттилоъи масъулони Беморхонаи вилоятии ш. Кӯлоб ҳамин лањзањо ташхиси пурра гузаронида шуда маълум шуд, ки 24% баданаи Фарзона Ғуломова сӯхтааст. Тафсилоти бештари ин ҳодисаро дар кутоҳтарин муддат «Пайк» пешниҳоди хонанда месозад.

НАХУСТИН СОҲИБКОРИ КӮЛОБӢ БА ВАЪДА ВАФО КАРД

Таври маълум, ҳудуди 1 моҳ қабл ёвари Президенти кишвар Абдуҷаббор Раҳмонов перомуни омодагӣ барои истиқболи арзандаи 30 солагии Истиқлолияти ҷумҳурӣ соҳибкорони кӯлобиро дар толори ҳукумати шаҳр гирд оварда машварат орост, то баҳри корҳои созандагӣ камари ҳиммат банданд.

Ин ҳам дар ҳоле, ки ба ақидаи баъзе аз мардуми маҳал, баъди корҳои созандагӣ дар чаҳорчӯби ҷашни 2700 солагӣ, 13 сол қабл, шаҳри Кӯлоб ба гӯшаи фаромӯшӣ рафта буд. Корхонаҳои саноатӣ бекор, роҳҳо вайрон, кӯчаҳо ифлос, бозорҳо бетартиб, шабҳо тор гаштанд. Маҳз баъди машварати Абдуҷаббор Раҳмонов шабҳои тори Кӯлоб равшан шуданд, роҳҳо сафолакпеч шуда истодаанд. Ҳафтавори «Пайк» ҳам хиёбони назди мағозаи ҳафтаворфурӯширо ободу зебо кард. Соҳибкорон ва аҳолӣ пушти хонаҳои худ ва муассисоти хусусиву давлатӣ садҳо чароғҳои каммасрафи  зебо насб карданд.

Мутаассифона соҳибкороне, ки дар он ҷаласа ҳузур доштанд ваъдаи зиёд доданд, аммо то ҳанӯз баҳри иҷрои ваъда камар набастаанд ба ҷуз як нафари онҳо, он ҳам Абдунабӣ Зардиев. Ин соҳибкор нахустин соҳибкори кӯлобӣ аст, ки баъди 27 соли истиқлолият ба ваъдаи додаи худ сари вақт вафо кард. ӯ дар деҳаи Сарёзии ҷамоати Зиракии шаҳр мактаби ибтидоӣ сохта ба истифода дод. Дуруст аст, ки мактаб ҳамагӣ иборат аз 8 синфхона аст, аммо синфхонаҳо хеле зебо ва барҳавоянду муҷаҳҳаз ба ҳама шароитҳои таълиму тадрис. Муҳимтар аз ҳама ин мактабро соҳибкор дар муддати хеле кӯтоҳ, ҳамагӣ 1 моҳ(!) сохт, ки ин нишонаи ватандӯстӣ ва дастгирии сиёсати созандаи Пешвои миллат аст.То ҳанӯз соҳибкорони кӯлобӣ ба чунин иқдоми беғаразона ва дур аз манофеи шахсӣ даст назада буданд. Ҳама чизе месохтанд, ки аз он бевосита манфиат мебардоштанд.

Маросими ботантанаи ба истифода дода шудани муассисаи таълимии сохтаи Зардиев дар рӯзи ҷашни истиқлолият, яъне 9 сентябр ба вуқӯъ пайваст ва боиси хурсандии беҳадду канори сокинони деҳаи Сарёзӣ гашт. Дар маросими ботантана раиси мақомоти иҷроияи ҳокимияти давлатии шаҳри Кӯлоб мӯҳтарам Хайрулло Амонулло, муовинони ӯ, раиси хоҷагии Мир Саид Алии Ҳамадонӣ Абдуҷаббор Зардиев, шоири номдори миллат Ҳақназар Ғоиб, собиқадорони меҳнат ва дигар ашхоси мӯътабар ширкат доштанд. Қисми тантанавӣ, ибоат аз намоишҳои театрикунонидашуда ва консерт дар бинои боҳашамати Қасри фарҳанги хоҷагии Мир Саид Алии Ҳамадонӣ баргузор гашт.

Ба ваъда вафо кардани нахустин соҳибкори кӯлобиро сокинони маҳалл бо дилгармӣ пазируфтанд. Умед бастанд, ки шояд соҳибкори дигаре бо номи Бег Сабуров ба ваъда вафо карда корхонаҳои саноатии Кӯлобшаҳрро аз қабили корхонаи хишт, Пахтатозакунӣ, Равған, Пояфзол ба кор дарораду билохира ҷавонони кӯлобӣ соҳиби ҷои кор ва зиндагии муносиб шаванд. Алҳол ин соҳибкор ба сохтмони хонаҳои баландошёна барои фурӯш ва меҳмонхонаҳо банд аст.

Ду соҳибкори дигар ҳам дар назди хонаҳои худ чанд метр роҳро асфалтпӯш кардаанд, ки ин кирои гап набошад ҳам, барои шаҳри Кӯлоб амали кучак нест.

Ду соҳибкори дигар Наврӯз Комилов ва Масидиқ Одинаев ҳам мутаносибан яке саргарми сохтмони озмоишгоҳҳои Донишгоҳи технологии Кӯлоб асту дигаре гири сохтмони фабрикаи мурғпарварӣ, аммо ин ҳарду ба ваъдаҳои як моҳ пеш дода дохил намешавад. Балки ин сохтмонҳо аз баракат ва иқболи баланди Президенти мамлакат, Пешвои муаззами миллат, муҳтарам Эмомалӣ Раҳмон вобаста аст ва мардум барои чунин сохтмонҳо аз Президент миннатор аст.

Ҳафтавори «Пайк» минбаъд ҳам пайгири ин масъала боқӣ хоҳад монд. Ҳар як хишти гузоштаи соҳибкорон аз назари мо дур нахоҳад монд.

Аҳмади Иброҳим

ТОҶИРОНИ ГАНДА ИДҲОРО БАРҲАМ МЕДИҲАНД


Бе ягон далели шаръию баҳси домандору видеову аксу садои таскиндеҳ яқинан, ки аз арафаи ду иди мусалмонӣ аз ҳама дида ҳамон савдогароне фойда мебинанд, ки бо хости худ нархро бозӣ медоронанд. Омма бошад танҳо хариданро медонаду баъд аз маърака аз куҷо овардану ёфтани пул ва пушондани «ушерб»-ро. Агар дар бозорҳои мо чунин шеваи доду гирифт сурат гираду нарх танзим нашавад, интизор бошем, ки аз касофатии нархи баланд идҳои фархунда Рамазону Қурбонро барҳам диҳанд. Аз нафси беинтиҳои як гурӯҳ тоҷиракон хурсандию фараҳ ва табассуму сарфарозии мардум, шуруъ аз тифли гаҳвора то пири асобадаст дар арафаи ҷашнҳо ба интиҳо расад. Қадами он хешу ақрабо ва дӯстону наздикон, ки як соли расо аз ҳолу аҳволашон бехабарему бо шарафи ду ид ба хонаамон қадам мегузоранд, канда мегардад.

Тоҷирон, идҳоро барҳам надиҳед!

Дастурхони идонае, ки дар арафаи ҳама гуна ҷашну маросим, чӣ ҷашни чилу солу ҳафту тӯй ва минҷумла, ду иди суннатие, ки пеш аз таҷлили он ба хароҷоти ҳангуфту миёншикан панҷа мехалонанд, ҷонибдорам, ки 100 фоиз ба танзим дароварда шавад! Агар он дар ҳақиқат мавриди амал қарор гирад, албатта ба нафъи вазъи иқтисодии оилаи ману шумову онҳо ва садҳои дигар анҷом хоҳад ёфт. Аз мавзуъ каме дур рафтем, вале на он қадаре, ки ба сафсатта печида бошем. Хуб, мегузарем сари хурсандии кӯдакон дар ин ду ҷашн. Қасам ба виҷдонам, ки ҷуз кӯдакону наврасон дар ду ҷашни болозикр ҳеҷ як нафар хурсандии беш дошта наметавонад. Ин аз он сарчашма мегирад, ки ҳанӯз як моҳ қабл аз ид эшон барои дастаҷамъона “идгаштак” ё “идгардак” кардан ба худ бо сад орзуву ҳавас либосу халтачаи идона мехаранд. Чун дар олами кӯдаконаи худ дар ибтидои рӯз дастаҷамъона дарҳои хонаҳоро мекубанду болидарӯҳона «иди мора биёреду иди шумо муборак» гуфта, ба ҳар як хона файзу баракати худро меоранд, ки ҳамин идҳоро иди кӯдакон номем ҳам бехатост. Хусусан ҳамин манзара дар русто бисёртар ҷолибу фараҳбахш аст. Кӯдакону наврасон субҳи барвақт бо шеъри идонаи худ дарҳои хонаи ҳар яки моро мекубанду шодиёна мехоҳанд.

Ҳароси бештар сари он аст, ки аз пушти як туда савдогарони оҷиз аз инсофу дур аз имон шуда ду ҷашни муборак Рамазону Қурбонро барҳам надиҳанд. Пеш аз оне, ки ба савол посух гардонем бояд саволе ба миён гузорем, ки аз ин ду ҷашн кӣ нафъи бештар мебардорад, мардум ё тоҷир?

Ва агар ба вазъияти як ҳафта ё ду рӯз қабл аз ин маросимҳо диққат диҳем, тамоми дукону бозору мағозаҳоро анбуҳи мардум пахш мекунад. Ба хотири хариди анвои маҳсулоти идона. Ва он ҳам бошад чун одат ва «анъана»-и савдогарон бо нархи дандоншикан. Дар инҷо як нуқтаро бояд ба инобат гирифт, ки эшон дар кадом вазъият, бо қарз ё пули дуздӣ ё пули бо ранҷу меҳнати беинтиҳо нияти дастурхони идонаашонро аз анвои маҳсулот пур кардан мехоҳанд. Пас, қазоват бояд кард, ки дар ҳамин гуна мавридҳо ба ҷуз «ушерб» ба мардум чизи дигаре насиб намегардад. Вазнинии тарозу (яъне фоида) ҳамеша ҷониби тоҷирону савдогаронест, аз ин ҳол пайгирона ва ҳадафмандона суистифода менамоянд. Интизор меравад, ки аз касофати як тудаи ҷаллобону хоинон шуда, иду ҷашнҳоямонро аз даст медиҳем.  

«Деҳқонбозор» бозори деҳқонон ё монополияи ҷаллобон?

Намоиши, ба қавле молу маҳсулоти арзони як рӯз қабл аз иди Қурбон баргузор гардида, нишон дод, ки ҳануз барои марди деҳқон «шонси васеъ» гуфтани мафҳум барои савдои маҳсулоташ ба даст наомадааст. Усулан бо нияти хариди маҳсулоти арзон мардум ба тарафи Деҳқонбозор  мешитобанд, ба хотире, ки ба маҳсулоти арзони бобои деҳқон дастрасӣ пайдо созанд. Бехабар аз он, ки деҳқон дур аз чашм дар кадом кунҷе нишаста аз тарси чекчину савдогарони ғоратгар савдо дорад. Ба далели он ки анқариб ҳамаи фурӯшандагон деҳқон не, балки ҳамунҳое буданд, ки солҳои сол дар бозори марказӣ ба савдои анвои мевагӣ машғул. Тарзи дигар гӯем, ҳамон гургҳои борондида, ки солҳои сол ба фарқ аз деҳқон нархи маҳсулоти худро як ё ду дараҷа баланд мебардоранд.

Дар ҷодаи нарх бошад, боз ҳамон нигарониҳои қаблӣ. Ҳеҷ як пешравӣ ё беҳбудӣ  дар нархгузорӣ дида намешуд. Не, бахшиш хонада, каме хато кардам, беҳбудӣ буд албатта, лекин барои мардум не, барои киссаи худи ҳамон савдогарон. Чун ба нархи қаблии маҳсулоташон боз маблағи бештар зам карда буданд. Шояд лозим набошад иқтибоси нархҳои он молу маҳсулоти ба заҳр баробар. Лекин мебояд гуфт, ки намоиш-фурӯши маҳсулоти ба ном арзону деҳқонӣ,  дар асл ҷаллобона чӣ фоида?

Агар гӯям, ки деҳқон набуд, дар арафаи моҳи муборак гуноҳи азим мешуд, вале он ҷойҳои ба гуфти мардуми мо «пристиж» дар дасти ҳамон тоифае буд, ки пайваста нархро бозӣ медоронанд. Деҳқононе, ки маҳсулоти худро арзонтар пешниҳод месохтанд, аз чашми харидор дур дар қисмати охири намоишгоҳ қарор гирифта буданд, ки имкони ками фурӯши маҳсулоташонро доштанд.

Ҷони мурда раҳм дораду дили савдогар не!

Бегумон, нархи аз эътидол бологузоштаи молу маҳсулот зарбаи асосӣ баҳри барҳам занондани ду ҷашни барои мардуми мусалмон муқаддас хоҳад гашт. Тавре, ки ба ҳамагон маълум аст, пеш аз истиқболи иду ҷашнҳо яку якбора нархи аксари маҳсулот боло меравад, не саросема шудем, боло бурда мешавад. Шуруъ аз оддитарин ашёи рӯзгор то маҳсулоти ниёзи аввал. Баъди афзоиш ёфтани нархи картошка, хусусан дар Кӯлоб ва ба ҳадди эътидол надаровардани он фикри ғолиб он буд, ки шояд дар арафаи моҳи Рамазон он то андозае поин фароварда шавад. Ҳангоми харид аз як фурӯшанда нархи картошка ва аз куҷо овардани онро пурсидем. Гуфт картошкаро аз Муъминобод овардему як киллограммаш 5 сомонӣ. Қаблан ҳам бо ҳамин нарх ва аз он зиёд картошкае, ки аз хориҷи кишвар ворид мешуд фурӯхта мешуд, лекин ба маҳсулоти дохилӣ чӣ бади мерасад?

Бинам, ки дар мағозаю бозорҳои шаҳр

Беназмию ҳаёҳую ҳангомаҳо бувад,

Парвози фикрашон фақат то нархи ину он,

Маънии зиндагияшон нарху наво бувад.

Салоҳ надонистем, ки гапро ба дарозо барем ва ҳамин сархати навиштаамонро бо шеъри пурмаънии шоири шинохта устод Лоиқ Шералӣ анҷомидем. Ҳарчанд устод ҳаждаҳ сол муқаддам аз дунё гузашта бошанд, вале аз шеър бар меояд, ки то ҳол рӯҳи эшон зинда асту аз вазъияти нарху наво ва муқаррароти савдо куллан бохабаранду дилашон ба ҳоли мардуми бечора месӯзаду кори «аферистона»-и баъзе тоҷиронро ба риштаи назм кашидааст.

Худойдоди Ислом

Бақайдгирии симкортҳо то 1 январ тамдид шуд


Президенти  Тоҷикистон  Эмомалӣ Раҳмон ба вазорату идораҳои дахлдор супориш додааст, ки фурӯши симкортҳои 250-сомониро то 1-уми январи соли 2019 манъ кунанд. Ба ин тартиб, ширкатҳои мобилии ҷумҳурӣ вазифадор карда шудаанд, то чаҳор моҳи дигар симкортҳоро ба таври маъмулӣ фурӯшанд.

Президент ғами мардумро хурд

Дар бобати қарори мазкур сухангӯйи президент Абдуфаттоҳ Шарифзода, гуфтааст, ки масъалаи афзоиши нархи симкортҳо рӯзи 30-юми август дар ҷаласаи ҳукумати Тоҷикистон баррасӣ шуд. Дар ин ҷаласа ба роҳбари Дастгоҳи иҷроияи Президенти Тоҷикистон Раҳмон Озода Эмомалӣ супориш дода шудааст, ки дар робита ба масъалаи нарх ва тартиби истифодабарии симкортҳо пешниҳод ироа кунанд. Дар  ҳоли ҳозир масъалаи ба ҳар як шаҳрванди ҷумҳурӣ додани як симкорт ва маҳрум сохтани истифодаи симкорт то синни 14-сола дар ҳоли санҷиш аст. Инчунин, пешниҳод шудааст, ки ояндаи наздик операторони телефонҳои мобилӣ ба ҳар як шаҳрванд аз рӯи коди идентификатсионӣ (рақами ягонаи миллӣ), ки дар шаҳодатномаи миллӣ сабт шудааст, симкорт бидиҳанд.

Овоза

Аввалҳои моҳи августи соли ҷорӣ маълум шуд, ки мақомоти Тоҷикистон нархи як симкорти телефонҳои мобилиро то 250 сомонӣ муқаррар карданд. Дар аввал қарор буд, ин тасмим 20-уми август иҷро шавад, вале дертар ширкатҳои мобилӣ эълон карданд, ин тасмим аз 1-уми сентябр амалӣ мешавад. Ин тасмимро мардум дар аввал овоза ва хабари дурӯғ гумоштаанд, аммо баъдан сару садои якбора 50 баробар боло рафтани нархи симкортҳои мобилӣ мардумро ба таҳлука андохт. Аз муҳлати ками вақт мардуми тоҷик истофода бурда, то охирин рӯзҳои моҳи август, ҳатто бо номи шаҳодатномаҳои фарзандону набераҳояшон симкорт харидорӣ кардаанд.

Вазорати корҳои дохилӣ ҳабсро талаб кард!

Қаблан Вазорати корҳои дохилии Тоҷикистон ба касоне, ки симкорташонро барои истифода ба нафари дигар додаанд ё каси дигар онро ғайриқонунӣ соҳиб шуда, "ба оқибатҳои вазнин оварда расондааст", ҷазо пешниҳод кард. Вазорат дар тарҳи тағйиру иловаҳо ба моддаи 341-и Кодекси ҷиноии Тоҷикистон, барои чунин афрод аз 150 то 250 нишондиҳанда барои ҳисобҳо (аз 7,5 ҳазор то 12,5 ҳазор сомонӣ) ҷарима ва ё аз ду то се соли ҳабсро талаб намудааст. Мақомоти вазорат то ба ҳол расман тасмими худро шарҳ надодаанд. Аммо ин тасмим ҳануз дар њоли омўзиш аст. Ҳадаф аз ин пешниҳод ҷилавгирӣ аз фаъолияти аъзои гурўҳҳои ифротгаро ва мамнуъ аст. Онҳо аксаран аз симкорти афроди дигар истифода мекунанд. Аз як тараф боздоштани онҳо мушкилтар аст, аз сӯйи дигар метавонад одами бегуноҳеро зери зарба гузорад. Дар сурати ворид шудани ин иловаҳо ба қонун мардум ҳам боэҳтиёт мешаванд ва симкорташонро ба ҳар кас намедиҳанд ва ё бо шиносномаи худ ба дигарон симкорт намегиранд.

Решаи қарор ҳамла ба сайёҳон

Дар  Тоҷикистон чаҳор ширкат – "ВаВилон", "Тселл", "Мегафон" ва "Билайн" ба аҳолӣ хадамоти мобилиро пешниҳод мекунанд. Дар Тоҷикистон айни замон 4,1 миллион муштарии фаъоли алоқаи мобилӣ вуҷуд доранд.  Тасмими якбора боло бурдани нархи симкортҳоро ба ҳамлаи террористон ба 7 сайёҳи хориҷӣ арзёбӣ мекунанд, ки дар натиҷа чор нафари онҳо ба ҳалокат расида буд, ки маќсадашон обру ва эътибори миллиати тоҷикро дар арсаи ҷаҳонӣ паст задан буд.

Нуралӣ КАРИМ

ЧАРО НУСРАТУЛЛО САЛИМОВ БА ВАЪДА ВАФО НАКАРД?

Бахшида ба рӯзи кормандони тибби ҷумҳурӣ


Ҳафтаи гузашта корамон ба беморхонаи вилоятии №2 мустақар дар шаҳри Кӯлоб афтид. Рентгени косахонаи сар лозим шуд. Табиб тавсия дод, ки барои рентген кардан ба ноҳияи Восеъ равем, чунки дар шаҳри Кӯлоб чунин дастгоҳ вуҷуд надорад. Аз дил гузаронидам: «кори Кӯлоб ба ҷое расида, ки акнун беморонаш барои дарёфти акси босифати сар ё узви дигар ба ноҳияҳо мераванд. Баъди ин, насли навҷавон шояд шубҳа кунад, ки дар гузашта Кӯлоб маркази вилоят буд. Воқеан барои ин насл чӣ фарқ дорад, ки вилояти Кӯлоб бошад ё вилояти Восеъ?

Чун нек андеша кардем, вилояти Кӯлоб баъди барҳам хурданаш дар аҳди салтанати сардори Фронти халқӣ Сангак Сафаров дар соли 1992 бо амри тақдир на танҳо аз корхонаҳои саноатӣ, балки аз бисёр чизҳои дигар ҳам маҳрум гаштааст. Зикри бадбахтии саноати Кӯлоб ва соҳибкорони фориғболашро мо дар ҳамин ҳафтавор дар мақолаи «Кӯлоб барои соҳибкорон қабристон аст!?» (Пайк, №22 (233) аз 30 майи соли 2018) баён карда будем. Ташаккур ба ҳукумати вилоят ва ҷумҳурӣ, ки ба ин мақола вокуниши ҷиддӣ нишон доданд. Кор дар самти эҳёи корхонаҳои саноатӣ аллакай оғоз шудааст, умед аст, ки дар 3-4 соли дигар мардум соҳиби ҷойҳои кор ва зиндагии муносибтар шаванд. Ҷаҳду талошҳои раиси вилояти Хатлон мӯҳтарам Давлатшоҳ Гулмаҳмадзода, ёвари Президенти ҷумҳурӣ Абдуҷаббор Раҳмонов ва сарвазири кишвар мӯҳтарам Қоҳир Расулзода имрӯзҳо дар самти кор бо соҳибкорон назаррас аст. Гарчанде, ки то ҳанӯз ягон соҳибкор барои адои ваъдаҳои додааш гоми нахустин нагузоштааст. Ҳамин ки гузоштанд, мо ҳатман аввалин шуда  ба хонандаи ҳафтавор хабар медиҳем.

Ва аммо алҳол мушоҳида кардем, ки соҳаи тандурустӣ дар минтақа бо ду пой мелангад. Ин ҳам дар ҳоле, ки вазири тандурустии ҷумҳурӣ Насимҷон Олимзода худ зодаи ҷамоати «Кӯлоб»-и шаҳри Кӯлоб аст. Таманниёти Пешвои муаззами миллат дар мавриди обод кардани зодгоҳи худ айни ҳол нодида гирифта шудааст; бошад ки бинанд.

Ҳасрати Искандаров

Чанд нафар аз шумори беморони шифоёфта дар ҳамин ҳафтавор ба вазири ҳозираи тандурустии ҷумҳурӣ Насимҷон Олимзода изҳори сипос карданд, ки мо онҳоро бе таъхир ба нашр расондем. Аммо барои як вазир, гумон дорам, изҳори сипоси даҳ бист бемори шифоёфта кам аст. Ақидаи ман ҳамин аст, намедонам дигарон чӣ андеша доранд. Дар ҳар сурат ақидаи дигарон барои мо муҳим аст. Рисолати як вазир бештар аз он аст, ки 5-6 нафар шифо ёбад, балки рисолати вазири тандурустӣ ҳифзи сиҳатии тамоми мардум аст! Ҳамин ҷо мо аз ҷузъи рисолати аслии вазир сухан мегӯем, ки иҷрои он обирӯйи вазирро хеле боло мебардорад.

Хуллас, ҳамон рӯзе, ки ҷиҳати ташхиси як бемори ошно ба шӯъбаи гӯшу гулӯйи беморхонаи №2 вилоятӣ муроҷиат кардем як нафари дигар бо писараш дар утоқи кори табиби хеле ҷавону умедбахш Искандар Шарипов менишаст. Онҳо расми акси рентгениро ба табиб нишон дода гуфтанд, ки ин акси томографияи сарро дар шаҳри Душанбе карда овардаанд, чунки дар Кӯлоб набудааст. Сипас илова кард, ки харҷи сафар баробар ба нархи томография шуд.

Ду ҳафта қабл аз ин  хабарнигори ҷавони ҳафтавори «Пайк» Худойдоди Ислом гирифтори иллати санги гурда шуду боз ба ҳамин беморхона муроҷиат карда будем. Дигар куҷо равем, ин беморхона хонаи уммеди на танҳо мо, ки мақарри табобати хело бештар аз 1 миллион аҳолии камбағали (!) минтақаи Кӯлоб аст.

Хулласи калом, табиб Искандаров Саид ба аксҳои хира ва бесифати рентгении (он вақт мо намедонистем, ки дар Восеъ дастгоҳи рентгении рақамӣ аст) узви бемори Худойдод назар афканда, бо маҳорату таҷрибаву малакаи хуби худ макон ва феъли сангро дуруст муайян кард ва тавассути ҷарроҳӣ ин иллати беморро бартараф намуд, ки мо аз духтур то қиёмат миннатдорем. Бе асбоби муосир ҳам кор тамом шуд, аммо… Саволе посух намехоҳад, ки чунин табиби кордида ва боҳӯш дар минтақа чанд нафар боқӣ мондааст? Табибони ҳозиқи камҳавсала ва бедилу гурда минтақаро кайҳо тарк карда ба мақарри таҷҳизоти муосир рафтаанд. Ва аммо дар тамоми давраи муолиҷа ин табиби хеле маҳбуб афсус мехурд, ки беморхона дастгоҳи замонавии шикастани санги гурдаро надорад, набошад ҳоҷат ба истифодаи теғ намешуд.

Ба ҳар ҳол, сипоси беҳад ба Искандаров, ки бо асбобҳои асри гузашта ба хубӣ аз ӯҳдаи наҷоти ҷони як инсон баромад. Табибон бузурганд, чунки ҳамвора машғули таъмири вуҷуди беҳтарин ва дӯстдоштатарин махлуқи Худо- ИНСОНАНД! Кош ҳама инро дарк мекард. Гоҳо чун дар маъракаҳо мебинӣ, ки устои мошин боиззаттар аз устои вуҷуди инсон аст, хастарӯҳ мешавӣ.

Бубинед, акнун чанд дастгоҳи замонавӣ дар беморхонаҳои Кӯлоб нест: рентгени рақамӣ, томография, дастгоҳи лазерии шикастани санги гурда… Шояд ин рӯйхат идома дошта бошад, аммо мо дараки фақат ин се дастгоҳро ёфтем. Маълум аст, ки беморони ниёз ба ин таҷҳизот дошта чӣ қадар сарсон мешаванд. Дар сомонаҳои тиҷоратӣ банда нарху навои ин таҷҳизотро ҷӯё шудам. Чун гуфтанд беш аз 100 000 евро, ҳӯш аз сарам парид. Ҳамин ҳиссиётамро баён доштам, ки фурӯшандаи виртуалӣ хандид (смайлики занда равон кард). Гашта пурсидам чаро. Гуфт инҳо камбаҳотарин таҷҳизоти тиббианд. Таҷҳизте дорем, ки беш аз миллион евро нарх дорад!

Кӯлоб аз Нусратулло Салимов миннатдор аст

Мардуми огоҳи минтақаи Кӯлоб аз вазири собиқи тандурустии ҷумҳурӣ Нусратулло Салимзода ва ҳафтавори «Пайк» миннатдор аст. Гап сари он, ки баъди нашри мақолаи «Кӯлобиҳоро вазир намонед!» (Пайк №42 апз 21.12 2016) вазир дар чаҳорчӯби вокуниш ба мақола ба беморхонаи №2 вилоятӣ кумаки назаррас карда буд. Тибқи вокуниши ирсолкардаи маъмурияти беморхона баъди нашри мақолаи танқидӣ вазири мӯҳтарам чунин кумакҳоро ба беморхона расонда буд. Иқтибос аз вокуниш: «Хушбахтона баъди нашри мақола бо мусоидати вазорати Тундурустӣ ва ҳифзи иҷтимоии ҷумҳурии Тоҷикистон ба беморхонаи мазкур ба маблағи зиёда аз 578 716 сомонӣ таҷҳизоти тиббии замонавӣ аз қабили дастгоҳи ЭЭГ, ултрасадо, ЭКГ, анализатори биохимиявӣ, дастгоҳи нафасдиҳии сунъӣ ва доруворӣ ворид карда шуд.» (вокуниш ба мақолаи «Кӯлобиҳоро вазир намонед» Пайк №21 (188) аз 21 июни соли 2017).

Инчунин Нусратулло Салимов ба муовинаш супориш дода буд, ки ҷиҳати ошкор кардани камбудиҳои дигари соҳа ба шаҳри Кӯлоб биёяд. Дар баробари дигар корҳои профилактикӣ муовин барои ошкори камбудиҳои дигар дари редаксияи ҳафтаворро низ куфт. Гуфт мо фалону фалон миқдор камбудиҳоро ошкор сохта бартараф кардем, акнун шумо бигӯед, ки боз чӣ камбудиҳоро шумо дар рафти тадқиқоти журналистӣ ошкор кардед, ки мо онҳоро бартараф созем. Ба андешаи мо ин аст ҷавонмардӣ, дарки масъулият, ғамхорӣ ба соҳа ва мардум, дипломатия боз ким чиҳои хуби дигари вазири собиқи тандурустии ҷумҳурӣ, алҳол раиси ҳукумати ноҳияи Синои пойтахти кишвар Нусратулло Салимов. Фурсат ғанимат гуфта, мо ҳам дар бораи ду дастгоҳи барои сохтори тандурустии минтақа муҳим- рентгени рақамӣ ва дастгоҳи шикастани санги гурда лаб кушодем. Баъди сӯҳбат бо вазир, муовин иброз дошт, ки ин камбудиҳоро низ вазир бартараф мекунад. Мо аз ин ваъдаи вазири тандурустии вақт хело шод шудем. Ва аммо…

Афсус, ки вазир ба кори дигар гузашту муовин вазир шуд, вале ваъдаи додаи мӯҳтарам Салимов иҷро нашуда монд.

Восеъ «брэнд» шуданист?

Табибони ҳозиқи камҳавсала бошанд то ҳанӯз бо ҳасрат аз таҷҳизоти замонавӣ ёд мекунанд ва ба қавли бародарони рус ҳамвора рӯйи ҷомадон нишастаанд, то ба хотири дарёфти беморхонаҳои замонавӣ дар пойтахт, тарки Кӯлоб кунанд. Даҳҳо ҳазор беморони минтақа бошанд бо умеди дарёфти табобати муносиб ва замонавӣ бо харҷи  маблағи хело бештар ба шаҳрҳои ободтари ҷумҳурӣ: Душанбе, Хуҷанд, Данғара, Бохтар ва ҳатто Восеъ мераванд. Кас намедонад, аз ин ба баъд ба ҷои Кӯлоб ноҳияи Восеъ «брэнд» шуданист…??? Шавад ҳам аҷаб нест, чунки Восеъ хеле мардуми бофарҳанг дораду обод аст.

Иттилоъ барои андеша:

Камаш таи даҳ соли ахир. шахсан банда боре надидаам ва нашунидаам, ки дар минтақаи Кӯлоб шахси сарватманде дар беморхонаҳои Кӯлоб бистарӣ шуда бошаду табобат гирад. Шояд дар Кӯлоб табобат гирифтанро барои худ айб шуморанд. Ҳатман маблағҳои ҳангуфт сарф карда берун аз минтақа табобат мегиранд. Мабодо касе аз онҳо хасисӣ карда дар Кӯлоб табобат гирад ҳам, инро сахт пинҳон медорад.

Шояд сабаб ҳамин кӯлоббезории дастдарозони давр бошад, ки дар Кӯлоб табибони савори мошинҳои дакаданг хело кам ба чашм мерасанд. Ҳама савори мошинҳои «Некси» ва «Опел»-ҳои кӯҳнаю вайронаанд.

Ахиран, сардухтури беморхонаи бемориҳои сироятии шаҳри Кӯлоб Шокировро дидам, ки ҷиҳати тамом шудани бензини мошини тамғаи «Опел»-аш дар нимароҳ монда буд. Шояд дар ҳамин лаҳза беморе рубарӯ бо марг роҳи ӯро мепоид. Ҳамагӣ ду моҳ қабл Шокиров якҷо бо табибони дигари пиёдаву қисман савори ин беморхона барои аз чанголи марг наҷот додани журналисти шинохтаи ҷумҳурӣ Аслиддин Достиев бо тамоми ҳастӣ мубориза мебурданд. Бо таҷҳизоти кӯҳнаи аз дақиюнус боқимонда ин табибони камбағал ҳамарӯза даҳхо беморонро ба мисли ҳамкасби мо аз чанголи марг наҷот мебахшанд.

Табиби ҳозиқи дигар ҳам, ки басо мебинам аз саҳар то шом рӯйи по рост асту машғули табобати кӯдакон Сӯҳроб Сайдалиевро ҳам мудом баъди кор «Тангем»-савор мебинам. Аҷибаш ҳамин аст, ки ин табибони камбизоат мудом машғули табобати «Ҷип»-саворон ё пайвандони оҳоянд.

Яке аз чунин сарватмандон васфи табиби хеле ҷавони беморхонаи вилоятӣ Дилшод Холматовро мекард, аммо нагуфт, ки ин табиби умедбахши соҳаи асаби минтақа аз неъматҳои моддӣ то куҷо таъмин аст. Гумон дорам мегуфт, худ шарм медошт. Искандар Мирзоев, ки мошини беҳтар дорад «Хундай Тюксан» мошинро дар роҳҳои сангӣ онқадар оҳиста ва боэҳтиёт меронад, ки ту гуфтӣ агар ин мошин шиканад дигар велосипед харида наметавонад. Ман аз боби шароити фаолияти ҳамшираҳо ва бародарони шафқат чизе намегӯям. Фақат ҳамин чизи маълумро ёдрас мекунам, ки ин тоифа бо 400 сомонӣ маош соле камаш ду маротиба аз ҳисоби худ барои  семинар гузаштан ба пойтахти кишвар фиристода мешаванд. Гоҳо табибони ҳозиқи фироркарда, барои семинар гузаронидан ба Кӯлоб меоянд, аммо аз иштирокчиёни семинар, ки асосан ҳамшираҳои нодору бечораанд, то ду маошашонро мерӯёнанд. Ин дар ҳоле, ки малакаи баъзеи ин ҳамшираҳо ва бародарони шафқат бештар аз табибони маълумоти олидор аст. Бовар намекунед? Марҳамат, санҷида бинед, ки масалан ҳамшираҳо ва бародарони собиқадори шафқати беморхонаи №2  аз шӯъбаи Эҳёгарӣ Адолат, Анварбӣ Чупонова, Ҷамшед ё ҳамшираи беморхонаи бемориҳои сили вилоятӣ дар шаҳри Кӯлоб Дилафрӯз Раҳмонова дар муолиҷаи беморон ба чӣ қодиранд. Шахсан худ шоҳиди ҳол будам, ки Адолат солҳои ҷанги шаҳрвандӣ, вақте табибони камҳавсала аз Кӯлоб гурехта рафтанд, шабу рӯз бо эпидемияи домана даст ба гиребон буд. Касе намегуфт, ки ин духтар маълумоти олӣ надорад. Гоҳо шаб то ба рӯз ройгон (!) болои сари бемор менишаст, саҳар шавҳар ба сари ӯ мушт мебардошт, боз пайвандони бемор омада ҷонашро халос мекарданд. Рӯзи дигар ин ҷавонзан ба оби чашми пайвандони бемор раҳмаш омада, боз бе иҷозати шавҳар (аздусар шавҳар иҷозат намедод) ба сари болини бемор мерафт, боз шавҳар… Бо ин ҳол Адолат даҳҳо беморро аз чанголи марг кашида гирифта наҷот дода буд, то ҳанӯз ҳамааш зиндаю саломат ҳастанду баъзеашон аз носипосӣ ҳатто ба тӯйи фарзандонашон ӯро даъват намекунанд!

Аз фурсат истифода бурда ба вазири тандурустии ҷумҳурӣ муроҷиат карда мепурсам, ки магар вақти он нарасидааст, ки барои ҳавасманд кардани дигарон ба чунин ҳамшираҳо барои хизмати шоён нишон ё мукофоти дигари бигзор камбаҳо диҳед? Ҳақиқатро дар бораи фидокории онҳо метавон аз беморони шифоёфта  пурсид.

Кош Салимов вазир мешуду ин кори хайрро ба сомон мерасонид.

Ид муборак!

Аз фурсат истифода барда, аҳли эҷоди «Пайк» тамоми кормандони тибби минтақаи Кӯлобро бо иди касбиашон 17 август, ки ба рӯзи мавлӯди Пешвои табибони ҷаҳон Шайхурраис ҳазрати Абӯалӣ Ибни Сино рост меояд, табрику таҳният гуфта, барояшон тани сиҳат, дасти гиро, чашми бино ва киссаи доро таманно дорам.

Се дастгоҳи нодиреро, ки закрашон дар ин матлаб рафту барои сокинони минтақа чун боду ҳаво зарур ҳастанд, дар ин рӯзҳои иди Қурбон ва рӯзи табибон аз даргоҳи Худованд талаб дорем. Бигзор ваъдаҳои додаи собиқ вазири тандурустӣ Нусратулло Салимов, ки бо сабаби ба кори дигар гузаштанаш иҷро нашуданд, бо изни Худо иҷро шаванд.

Аҳмади Иброҳим

Тоҷикон ба Русия кӯч мебанданд

Тибқи иттилои Федератсияи муҳоҷирон, Вазорати умури дохилии Русия дар нимсолаи 2018, аз январ то июн 8 216 812 нафар муҳоҷири хориҷиро сабт кардаанд, ки аз теъдод— 1 131 392 нафарашон шаҳвандони Тоҷикистон ташкил медиҳад. Мувофиқи ҳисоботи тахминӣ ҳаррӯз 90 тоҷикистонӣ шаҳрвандии Русияро мегиранд.

ӯзбекон якум, тоҷикон дуюм…

Дар ҳисоботе, ки аз ҷониби Вазорати умури дохилии Русия интишор ёфтааст, дар гирифтани шаҳвандии Русия дар ин шашмоҳа шаҳрвандони ӯзбекистон зиёд шаҳрвандии кишвари Русияро ба даст овардаанд.  Чунончи дар ҳисобот омадааст аз ӯзбекистон - 2 247 519 нафар, Тоҷикистон — 1 131 392 нафар,  Чин — 663 779, Украина — 858 162 ва аз Қирғизистон 411 321 нафар мебошанд. Пойтахти Русия шаҳри Маскав, ки  дар маркази таваҷҷуҳи муҳоҷирони корӣ  қарор дорад 855 ҳазору 580 муҳоҷири хориҷӣ сабт шудаанд.   Дар ин радиф Вазорати корҳои дохилаи Русия шумораи муҳоҷироне, ки ҳадафашон кор аст, дақиқ нашр кардааст. Муҳоҷироне, ки ҳадафашонро кор нишон додаанд, дар Русия ба 2 миллиону 676 ҳазору 580 нафар баробар шудааст. Ки аз ин шумора муҳоҷирони меҳнатӣ аз ӯзбекистон- 1 116 598 нафар,  Тоҷикистон — 551 504 нафар, Украина — 238 655 ва Қирғизистон- 161 839 нафарро ташкил медиҳанд. Тайи моҳҳои январ — июни соли 2018 беш аз 126 ҳазору 412 нафар шаҳрвандии Русияро қабул кардаанд. Ин нишондод соли 2017 — 125 279 нафар ва 2016 ба 133 603 нафар баробар буд.  Тайи шаш моҳи аввали соли равон шаҳрвандони кишварҳои зерин табааи Русияро гирифтаанд:  Украина — 39 582 нафар, Қазоқистон — 21 266 нафар, Тоҷикистон — 16 324 нафар, Арманистон — 12 989 нафар, Узбакистон — 9 879 нафар, Молдова — 7 759 нафар ва Озарбойҷон — 5 668 нафар.

Вазорати муҳоҷират чӣ мегӯяд?

Ин ҳисоботи Вазорати корҳои дохилаи Русия дар ҳолест, ки қаблан дар нишасти матбуотии 26-уми июли соли ҷорӣ вазири Вазорати меҳнат, муҳоҷират ва шуғли аҳолии ҷумҳурӣ  Сумангул Тағойзода дар Душанбе гуфта буд, ки феълан ҳоло дар қаламрави Федератсияи Русия 1 121 337 шаҳрванди Тоҷикистон қарор доранд. Дар шашмоҳаи аввали соли ҷорӣ зиёда аз 250 ҳазор шаҳвандони Тоҷикитон ба Русия рафтаанд, ки аз 218 ҳазору 760 нафар мардҳо ва 32 ҳазору 487 нафарро занҳо ташкил медиҳад.

Аммо ба таъкиди вазир на ҳамаи онҳо муҳоҷирони меҳнатиянд ва теъдоди муҳоҷирони меҳнатии тоҷик дар Русияро 664 ҳазор нафар арзёбӣ кард. Ба гуфтаи Сумангул Тағойзода сафари шаҳрвандон барои муҳоҷирони меҳнатӣ ба хориҷ аз кишвар нисбат ба ҳамин давраи соли гузашта 3,5 дарсад афзоиш ёфтааст. Беш аз 240 ҳазор муҳоҷир дар ин давра ба Русия ва наздик ба 7 ҳазор ба Қазоқистон сафар кардаанд.

Тағойзода таъкид карда буд, ки дар дар баробари мардон занони тоҷик низ дар қаламрави Русия кору фаъолият мекунанд, ки қисми зиёдашонро муҳоҷирони меҳнатӣ ташкил медиҳанд.

Ба кӣ гирифтани шаҳвандии Русия осон аст?

Вазорати умури дохилии ФР қаблан моҳи гузашта тарҳи қонунеро омода кард, ки мувофиқи он мутахассисони моҳири хориҷӣ пас аз як соли кор дар Русия метавонанд шаҳрвандии ин кишварро  ба даст оранд. ВУД Русия пешниҳод мекунад, ки тартиби гирифтани шаҳврандӣ барои хориҷиёни соҳибихтисос осон шавад. Тавре муовини аввали вазири умури дохилаи Русия Александр Горовой хабар дода буд, пештар мутахассисон метавонистанд пас аз се соли фаъолият дар кишвар шаҳрвандӣ ба даст оранд, қонуни нав ин мӯҳлатро то 1 сол кам хоҳад кард.

Бори аввал дар бораи зарурати ин тағйиротҳо Президенти Русия Владимир Путин дар рафти "Пахши мустақим" 7 июн таъкид карда буд. Владимир Путин дар посух ба суоли хабарнигорон дар бораи гирифтани шаҳрвандии Русия гуфта буд, ки кишвар бояд ин равандро сода кунад. Ба гуфтаи Затулин, бо ин роҳ Руссия даҳҳо миллион ҳаммеҳанонашро ба ватан бар мегардонад. Вай пешниҳод кард, ки шаҳрвандони хориҷӣ тавонанд бе маҳрум шудан аз шаҳрвандии кишвари худ, дар Русия иҷозатномаи иқоматии доимӣ ба даст оранд.

Ба гуфтаи вакил, дар ҳоли сода кардани тартиби гирифтани шаҳрвандӣ, хориҷиёни бештаре ҷалб мешаванд. Зеро бештари нафаронеро, ки соҳиби шаҳрвандии Русия шудан мехоҳанд, ҳуҷҷатгузорӣ ва давутози зиёд метарсонад.

Тоҷикон зани рус мегиранд...

Чандин сол сипарӣ мешавад, ки аксари муҳоҷирони кории тоҷик барои гирифтани шаҳрвандии Русия ба занҳо рус оила барпо мекунанд, зеро дар ҳоли оиладор шудан бо шаҳрванди Русия барои муҳоҷир имкони гирифтани шаҳрвандӣ зиёд ва осон мешавад. Аксари лн муҳоҷироне, ки аз таърихи гирифтани зани рус ва шаҳрвандии Русия нақл мекунанд, аввал эшон зани мувофиқ ва ба пул муҳтоҷро дарёфта пас он пешниҳоди оиладор шуданро иброз мекунанд ва баъд аз оиладор шудан зуд барои гирифтани шаҳрвандии Русия ҳуҷҷат месупоранд. Аввал ба шаҳодатномаи хориҷии муҳоҷир муҳри сесолаии шаҳрвандии Русия зада мешавад ва пас гузашти як сол боз шаҳодатномаи панҷсола ва пас аз он шиносномаи Русия дода мешавад. Ин усули ба дастории шаҳрвандиро аксари муҳоҷирон истифода бурда, пас аз шаҳрвандии Русияро ба даст овардан, бо оилаи рус расман ҷудо мешаванд.

Имрӯз дар баробари ин ва дигар роҳҳо ҳар як муҳоҷири кории тоҷик орзӯ мекунад, ки ҳар чи зудтар ба шаҳрвандии Русия соҳиб шавад, то аз ҳуҷҷатгузориҳои ҳармоҳаву иҷозатномаҳои солона озод шавад.

Нуралӣ Карим

Муҳаммад ҳангоми машқ ҷони худро аз даст дод

Сӯбҳи имрӯз дар варзишгоҳи шаҳри Кӯлоб хонандаи синфи 7-и муассисаи   таҳсилоти миёнаи умумии №7-и шаҳри Кӯлоб, Ҷураев Муҳаммад ҳангоми варзиши саҳар  бо ҳамсабақонаш аз болои турник ба замин афтид. Қубури вазнини турник ҳам ба болояш меафтад. Ӯро оҷилан ба беморхонаи вилоятии №2, мустақар дар шаҳи Кӯлоб оварданд.

Бино ба иттилои масъулини беморхона Мухаммадро соати расо 8 - и саҳар ба беморхона оварданд, ки аллакай осор аз зиндагӣ надошт. .

Ба иттилои омӯзгорони мактаби №7 Ҷураев Муҳаммад, хонандаи фаъоли синф буда, рафтори намунавӣ дошт ва пайваста ба машқи бадан машғул буд.

Пайк

Страница 2 из 7

Суроғаи мо:

Joomla ru