Пайк

ХАБАРҲО

ИҶТИМОЪ

Чаро Ҳикматулло Шарипов қасди ҷони худ кард?

 

Вазорати умури дохилии Тоҷикистон бо гузашти чаҳор рӯз қасди худкушии Ҳикматулло Шарипов, сокини 37-солаи Ваҳдатро дар наздикии бинои шаҳрдории Душанбе тасдиқ кард, вале гуфт, ки ин ҳодиса ба қазияи манъи ҳаракати таксиҳои арзон дар пойтахт рабт надорад. Мақомоти умури дохилӣ рӯзи 15 апрел бо пахши изҳороти расмӣ гуфтанд, қасди худкушии Шарипов аз ҷанҷолу ҷудошавии ӯ аз ҳамсараш Шаҳноза Муъминова сарчашма мегирад. "Ҳодисаи рухдода аз рӯи ахбороти паҳншуда ба ронандаи таксӣ ягон алоқамандӣ надорад", - гуфтанд онҳо.

Дар изҳороти ВКД гуфта шудааст, "рӯзи 11.04.2017, соати 16-30, Шарипов Ҳикматулло Неъматович, соли таваллудаш 29.03.1980, ҳангоми гузаштан аз назди бинои Ҳокимияти иҷроияи шаҳри Душанбе қисми пеши гарданашро бурида, дар беморхонаи марказии шаҳраки тиббӣ бистарӣ гаштааст. Дар натиҷа маълум гардид, ки аз соли 2014 бо се фарзанд бинобар муноқишаҳои доимӣ аз ҳамсараш Муъминова Шаҳноза ҷудо шуда, ба сохторҳои давлатӣ мунтазам муроҷиат кардааст."

Мақомот мегӯянд, дар чанд соли охир Ҳикматулло Шарипов "дар натиҷаи муноқиша бо модарарӯсаш Улматова Эътибор, хонаи ӯро оташ зада, бо моддаи 255-и Кодекси ҷиноӣ ба ҷавобгарӣ кашида шудааст. Бинобар дар ҳолати руҳии носолим қарор доштанаш кӯшиши ба худкушӣ даст задан намуд, ҳоло бошад дар беморхона дар ҳолати муътадил қарор дорад."

Зокир Файзиев ва Шарифҷони Зокир, гумонбарони таркиши Қӯрғонтеппа

Ҳасанбой Раҳмонов

Мқомоти интизоми дар вилояти Хатлон баъди як моҳи таркиши маргбор дар рӯ ба рӯи Пракуратури ҳарбии шаҳри Қурғонтеппа, номи гумонбарони ҳодисаро ошкор карданд. Дар ин таркиш як нафар ҷон бохта буд.

Як манбаъ аз мақомоти интизомӣ имрӯз 12 апрел дар шаҳри Қурғонтеппа гуфтанд, ки падару писар, Зокир Файзиев ва Шарифҷони Зокир, сокинони деҳаи Зарбдори шаҳри Қӯрғонтеппа дар ин таркиш гумонбар буда, дар ҳабси пешакӣ қарор доранд. Парвандаи онҳо аз рӯи моддаи “терроризм”-и Кодекси ҷиноӣ таҳқиқ мешавад. Ба гуфтаи ин манбаъ "падар 49 ва писар 21"- сол дошта, Зокир Файзиеви 49-сола, то замони боздошташ ронандаи мошини борбари “Дулан” буда, писараш Шарифҷони Зокири 21-сола, дар ҷое кор намекардааст.

Дар пайи таркиши рӯзи 12 март дар шаҳри Қӯрғонтеппа Ҳасанбой Раҳмонови 67-сола, посбони литсейи тамоюли технологӣ, ҷон бохта буд. Додситонии вилояти Хатлон дар робита ба таркиш бар асоси моддаи “терроризм”-и Кодекси ҷиноии Тоҷикистон парванда боз кардааст. Аммо мақомоти интизомии Тоҷикистон дар ҳоли ҳозир аз баёни ҳамагуна иттилоъ аз ҷараёни тафтиши парвандаи падару писар ва ҳодисаи таркиши маргбор дар маркази Қӯрғонтеппа худдорӣ карданд. Онҳо гуфтанд, ки таҳқиқ мушаххас хоҳад кард, ҳодиса чӣ гуна рух дода ва ангезааш ҳам чӣ будааст.

Озордиҳандагони идораи комуналӣ зиндонӣ шуданд

Дар Маскав ду нафар собиқ кормандони идораи комуналии ноҳияи Тимирязев ба 5 ва 6 соли маҳрумият аз озодӣ маҳкум шуданд. Ин ду нафар, роҳрӯбонро дастгир карда ба хотири «тарбия додан» латту кӯб карданд. Дар ин бора дар сомонаи прокуратураи шаҳри Маскав хабар додаанд.

Бино бар иттилои манбаъ моҳи сентябри соли 2015 кормандони хадамоти комуналӣ Николай Кондратсеви 23 сола ва Даниил Зуеви 25 сола аз шаҳри Белгород омада дар хобгоҳи Хадамот ғайриқонунӣ иқомат гузиданд. Дар ин бора ду нафар аз роҳрӯбон ба идораи пулис хабар доданд.

"14 сентябри соли 2015 бо мақсади «тарбия» додани кормандон Зуев ва Кондратсев ду корманди идораи комуналиро бо мошини худ ба беруни шаҳр бурда, то ду рӯз нигаҳ дошта, таҳқиру таҳдид ва латту кӯб кардаанд.»-гуфта мешавад дар сомона.

Афюн насиби нашъамандон нашуд

Як манбаи мўътамади ПАЙК,куфт,ки  сокини шаҳри Қурғонтеппа С.Д. ҳангоми ба сокини ноҳияи Вахш Ю.Ш. додани бастаи селофании шубҳанок мавриди боздошт қарор гирифт.Дар рафти гузаронидани муоинаи шахсии С.Д. аз даруни киссаи тарафи чапи ӯ як адад бастаи селофании рангаш сиёҳ, ки дохили он хамираи қаҳваранги монанд ба маводи мухаддираи навъи афъюн дарёфт гардид.Тибқи ташхиси лабараторӣ маводи мазкур ба навъи гашиш тааллуқ дошта, вазни холиси он 58,3 гр-ро ташкил медиҳад.  Аз рӯи ҳодисаи мазкур бо дастрасии қисми 1 моддаи 201 Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, аз рӯи тобеъияти тафтишотӣ ба Прокуратураи вилояти Хатлон ирсол карда шуд.

Писари муовини сарвазир аз ҷавобгари озод мешавад?

Парвандаи ҷиноӣ нисбати Фаромӯз Саидов, писари муовини аввали сарвазири Тоҷикистон Давлаталӣ Саидов қатъ шудааст. Моҳи сентябри соли гузашта, бар асари садама бо ширкати писари 23-солаи нахуствазири Тоҷикистон дар Душанбе, ду нафар ҷон бохта буданд.

Шариф Ҳабибуллоев, як масъули Додситонии кулли Тоҷикистон рӯзи 3 феврал зимни нишасти хабарӣ гуфт, ки пас аз баррасиҳо муайян шуд, ки садама бо ширкати Фаромӯз Саидов бинобар ҷой доштани мушкили техникӣ сар задааст ва ба ҳамин далел, тафтиши ин парванда қатъ шудааст.

Ин масъули Додситонии кулли Тоҷикистон афзуд, ки ин парванда ҳоло аз тарафи муфаттиш қатъ карда шуд ва барои баррасӣ ба додситонӣ пешниҳод шудааст. Ба гуфтаи вай, додситонӣ далелҳои қатъи ин парвандаро баҳсу баррасӣ намуда  қонунӣ будани онро муайян мекунад.

Зимнан, шаби 10 сентябр дар хиёбони Исмоили Сомонии пойтахт садамае бо иштироки Фаромӯз Саидови 23-сола рух дод ва масъулони вазорати корҳои дохилӣ дар шарҳи ин ҳодиса гуфтанд, ки бар асари он ду нафар ҳалок шудааст. Фаромӯз Саидов баъди ин сонеҳа дар шӯъбаи ҷарроҳии асаб (нейрохирургия)-и бемористони Қарияи Болои Душанбе бистарӣ шуд.

 

Страница 7 из 7

Суроғаи мо:

Joomla ru