Пайк

ХАБАРҲО

ДИН

ҲОҶӢ МИРЗО: БА ҚАБРИСТОН РАФТАНИ ЗАНҲОРО КАСЕ МАНЪ НАКАРДААСТ


Дар арафаи иди саиди Қурбон шоҳиди сӯҳбати хеле пурҳасрат ва ғамноки як зан шудам. Ин зан рӯ ба писараш оварда мегуфт: «Бачам, пагоҳ рӯзи ид маро бо мошинат ба қабристон бар. Дар рӯбарӯйи гӯри додарат манъ кун, то дар ҳаққаш дуо кунаму дилам каме таскин ёбад. Як сол шуд, ки бе ӯ дар ин дунё хун мехурам. Дини ислом бошад ба ман иҷозат намедиҳад, ки руирост рафта дар сари гӯраш дуо кунам.»

Инро гуфта зан бо ҳасрат об аз дидагонаш фурӯ рехт. Дилам сухту ба ӯ гуфтам, ки апа, касе шуморо барои рафтан ба қабристон манъ накардааст, метавонед бемалол рафта дуо кунед.

Чун чашм ба сӯям афканд ба хубӣ дарк кардам, ки ба гуфтаҳои мани ба қавли ӯ даҳрӣ, сахт шубҳа кард. Ин зан ягона шахсе набуд, ки чунин ҳасрат мекард. Балки тули умр басо дида будам, ки нафарони зиёде ба ин савол посух меҷустанд, ки барои чӣ рафтани зан ба қабристон манъ аст.

Дар ин миён, саволе маро ҳам азият медод, ки ба кӣ лозим аст занҳоро аз ҳамин таскини дил, яъне ба сари гӯри пайвандон рафтану дуо кардан манъ кунад. Боз ҳам посух сӯйи хурофот кашиду бесаводӣ ва ҳарзагӯии баъзе аз муллоҳои чалласавод. Хуллас, ҳамаи он чизҳое, ки дур аз ҳақиқати исломанду боиси ифротгаро шудани мардум шудаанд. Ҳамон узви ДИИШ ҳам, ки зикраш дар ҳамин саҳифаи ҳафтавор рафтааст, язиддухтари поку бегуноҳро ба асорат гирифта ҳар гунае, ки хостааст истифода бурда, таҳқир карда, билохира мисли ғулом фурӯхтаву ҳаёташро сухтааст, побанди хурофот асту гумроҳ. Бо ин ҳама, баъзе аз мусалмони мо, ки ҳамин гуна тарбияи хурофотӣ гирифтаанд, боз бо чунин нохалафон пайваста якҷо шуда, алайҳи олами мутамаддин ва худи мусалмонон мубориза мебаранд.

Хулласи калом, хеле дилам ба он зани баччамурда сухт, ки аз дасти хурофот наметавонад ба сари гӯри писараки нокомаш равад. Медонам, ҳар қадар, ки банда амри ба маъруф накунам мардум ба ман бовар намекунанд, чунки ман мулло нестам. Чун ба ман бовар намекард, ҳамин саволро, ки оё ба занҳо иҷозат ҳаст, ки ба қабристон ба сари гӯри пайвандонашон рафта, дуо карда биёянд? Ба маъруфтарин чеҳраи рӯҳонии ҷумҳурӣ ба Ҳоҷӣ Мирзо додам. Посухи домуллои шинохта ва маҳбуби мардум Ҳоҷӣ Мирзоро пешкаши хонанда мегардонем, то бошад, ки баъзеҳо ба ин домуллои маъруфу маҳбуби ҷумҳурӣ бовар карда аз қайди дастикам як хурофот раҳо ёбанд. Инак посухи Ҳоҷӣ Мирзо:

«Дар асл рафтани занҳо ба сари манзил бо ҳадис ё оят манъ нашудааст. Замони дар қайди ҳаёт будани паёмбар алайҳиссалом занҳо иҷозат доштанд ба масҷид бираванд ва бо мардон якҷо намоз гузоранд. Сипас хушбӯӣ карда, ҳаракоти ҷалбкунанда анҷом доданд. Бинобар ҳамин дар аҳди хилофати халифаи дуюм ба масҷид рафтани занҳо мамнӯъ эълон шуд. Ҳазрат гуфт аз ба масҷид омаданатон наомаданатон беҳтар аст. Ба ҳамин монанд, занҳое, ки ба сари манзил рафтанд, баъзе амалҳоеро анҷом доданд, ки хоси занон асту аз хурофоту ширкиёт орӣ нест. Худро болои қабр афканда фиғон мебардоранд, рӯю мӯй мекананд ё аз ҳамон мурда чизе ба монанди бахт, фарзанд, фулузот талаб мекунанд. Бо ҳамин сабаб баъзе аз муҷтаҳидони мутааххир, рафтани занҳоро ба қабристон манъ карданд. Ва аммо чор мазҳаб дар ислом рафтани занҳоро ба қабристон манъ накардааст, бираванд гуноҳ намегиранд. Паёмбар ҳатто ба сари қабр рафтани мардумро савоб ҳисоб мекард. Паёмбар худ ба сари қабри пайвандон рафта дуо мекард: «Ассалому алайкум ё аҳлал диёри минал муъминина вал муслимин ва инна иншоалло бикум лоҳиқун, асъалуллоҳу лано лакумул офия.» Ба гуфти Паёмбар (а) муҳим аст дар ҳаққи қабристон дуо кардану ибрат гирифтан, ки оқибат роҳи ҳама ба инҷост. Чун оқибати инсон марг аст, бояд барои ба анҷом расонидани амалҳои хайру савоб шитоб кунад. Агар нияти занҳо низ ҳамин гуфтаи паёмбар бошад, рафтанашон ба қабристон амали хайр аст. Ҳатто дар «Саҳеҳи Муслим» омадааст, ки Расули Худо ба модарамон ҳазрати Биби Оиша амр кард, ки ба Ҷаннатулбақия (қабристони асҳоб) бирав ва дар ҳаққи азизони мо дуои хайр кун.»

Дар ҳақиқат, аз диди мо ҳам рафтани чӣ зан ва чӣ мард ба қабристон орӣ аз тарбия нест. Қабристон ҳушдор медиҳад, ки инсон дар дунё абадӣ нест. Имрӯз, ки дар қайди ҳаётӣ дар сар ҳазорон нақша дорӣ, хӯрок мехурӣ, ба меҳмонӣ меравӣ, таҳсил мекунӣ ва дигар амалҳоро анҷом медиҳӣ. Фардо, ки малакулмавт ҷонатро ситонид, манзилат ҳамон диёри хомӯшон мешавад ва дигар бароят касе ва чизе лозим нест, ҷуз ҳамон амалҳои хайру савобат. Мутаассифона имрӯз нафароне ҳастанд, ки умри кӯтоҳи худро ба корҳои беҳуда сарф мекунанд. Нашъаманд мешаванд, дуздӣ мекунанд, одам мекушанд. Аммо ҳамаи ин зуд мегузарад ва вақти ҷавоби ҳамаи инро гуфтан фаро мерасад, чуноне, ки аз дигар атрофиёни аз ҷаҳон гузашта аллакай фаро расидааст. Чун ба як инсоне бигӯӣ, ки ҳамагӣ як шаб дар қабристон биистад розӣ намешавад, вале чун умр ба поён расид қабристон манзили доимияш мешавад. Як ба атроф назар афканед, чӣ қадар мардумони неку бад буданд, имрӯз ҳамааш зери хок рафтаанд. Навбати ҳар кадоми мо ҳам фаро мерасад, бинобар ҳамин, бояд дар зиндагӣ коре кард, ки баъди маргат пайвандонат аз кирдори ту дар назди мардум сархаму шарманда нашаванд. Чуноне, ки Хоҷа Ҳофизи Шерозӣ гуфтааст:

Зиндаю ҷовид монд, ҳарки накуном зист,

Қ-аз ақибаш зикри хайр, зинда кунад номро.

Ё ҳамин хоҷаи бузургвор дар ҷойи дигар мегӯяд:

Баъд аз вафот турбати мо дар замин маҷӯ,

Дар синаҳои мардуми ориф нишони мо.

Биёед ҳар кадом дар арафаи ин иди айём андеша кунем, ки дар зиндагӣ мо чӣ кори хайреро анҷом додаем, ки атро фиён баъди маргамон аз мо ба некӣ ёд кунанд. Агар ба ҷуз бадӣ чизе ба гӯшаи хаёламон намеояд, пас вой бар ҳоли мо, ки умрро ба беҳуда гузаронидаем.

Ҳоло, ки иди саиди Қурбон аст, хуш бояд буд ва ҳар як нафасро ғанимат бояд шумурд, чун чанголи аҷал рӯйи ҳар кадоми мо фурсат меҷӯяд.

Молик

Иди Рамазон муборак!

Иди Рамазон ба ҳар мусулмон табрик!

Рушандилиҳову хатми Қуръон табрик! Идгардаки тифлакону дарҳои кушод,

Хурсандии сабзи Тоҷикистон табрик!

Ҳамватанони азизу маҳбуб!

Дар ин рӯзи фархунда аз даргоҳи Худованди мутаъол бароятон хонаободиву сарбаландӣ, тандурустиву фарохдастӣ , беҳтарин хушиҳои рӯзгорро орзу намуда, дар фаъолияти пурсамаратон баҳри пешрафти  соҳаҳои хоҷагии халќи мамлакатамон ва ба  мамлакатамон дастовардҳои бузургро таманно дорам. Орзумандам, ки ин Иди Саиди Фитр ба хонадони ҳар яки шумо файзу баракат, фатҳу нусрат ва бахту саодатро арзонӣ намояд.

Худо он миллатеро ёр бодо,

Ки ҳифзи дину оин кор бодо.

Бо таманнои амалишавии ин нияту орзўҳои нек як бори дигар ҳамаи Шумо ва кулли мусалмонони мамлакатамонро ба муносибати Иди Саиди Фитр самимона табрику муборакбод гуфта, бароятон хушҳолии рӯзгор, дастурхони пурнозу неъмат, барори кору комёбиҳои беназир, сулҳу ваҳдат  ва файзу баракатро таманно менамоям.

Бар пайкари олами вуҷуд ҷон омад,

Сад Шукр,ки имтиҳон ба поён омад.

Аз лутфи Худованди Халил Арраҳмон,

Як иди бузург бо номи Рамазон омад.

Саломату сарбаланд бошед!

Ғоратбизнеси мусалмонон дар Рамазон

Моҳи гуноҳсӯз,моҳи баста шудани шайтонҳои ҷиннӣ фаро расид, балки ба охир расид, ки таи сӣ рӯз моро боз бар арсаи мубориза бар нафс во гузошт,моҳи мубораке,ки «агар мусалмон бузургии онро медонист,ҳатман орзу мекард, ки дувоздаҳ моҳи  сол, балки тамоми умр Рамазон бошад», аз касрати баъзе соҳибкорони беинсоф моҳи зиёд кардани гуноҳҳо ва имонсӯзӣ шудааст.

Рамазон моҳи нуҳум дар гоҳшумории қамарист ва теъдоди рӯзҳояш 30-то буда, дар луғат ба маънои шиддати гармо ва тобиши офтоб ба регистон меояд. Рамазон мисли дигар моҳҳои қамарӣ ҳамеша дар чархиш аст. Аз ин рӯ, гоҳе Рамазонро дар сардии зимистон ва гоҳе дар гармои тобистон ва гоҳе дар фасли хазонрезу гоҳи дигар дар рӯзҳои фараҳбахши баҳорон пешвоз мегирем.

Чун рӯзҳои қамарӣ нисбат ба рӯзҳои соли шамсӣ камтар аст, аз ин рӯ ҳамасола моҳҳои шамсӣ даҳ рӯз пештар фаро мерасад.Чархиши давраии Рамазон (яъне, рамазоне,ки имсол дар 17 май омад) метавонад баъд аз 36 соли дигар мувофиқ ба ҳамин рӯз ояд. Ба ин хотир ба боварӣ метавон гуфт инсоне, ки беш аз 80 сол умр бинаду ҳанӯз аз замони кӯдакӣ ба рӯзагирӣ одат намояд, ҳамагӣ ду чархиши Рамазонро шоҳид мешаваду бас….

Худ гуноҳ мекунему шайтонро гунаҳкор меҳисобем

Вақте гуноҳ мекунем одат кардаем, ки онро ба гардани шайтони рондашуда вогузорему аз худ як шахсияти поку беолоиш тарошем, ба гунае, ки гуё аз мо гуноҳе сар назадаву аслан сар намезанад. Масъулияти гуноҳҳоро ба шайтон вогузор мекунем. Аммо моҳи Рамазон ин ҳама «поктарошиҳо»-и моро маҳв месозаду чеҳраи ҳақиқии моро ба мову атрофиён нишон медиҳад. Дар моҳи шарифи Рамазон,ки тибқи ривояту сарчашмаҳо «шайтонҳо ба занҷир кашидаву баста мешаванд» дигар наметавон гуноҳи кардаро ба гардани шайтон гузошту аз худ «мусичаи  бегуноҳ» тарошид.Оё мо дар мактаби рамазонӣ забонро ба ростгӯӣ ва ҳақиқат одат мекунонем ва ё ҳанӯз дурӯғ «тоҷи суханҳо»-тро ташкил медиҳаду ғайбат «зару  зевар»-и маҳфили мост? Чаро дар бораи шайтон ҳарф задем? Инак, мутоила кун хонанда шайтон гунаҳкор аст ё инсон.

Нархи гарон дар бозори «Ҳоҷӣ Шариф»

Ҷои таассуф аст ,ки савдогарони мо дар моҳи шарифи Рамазонро на ҳамчун моҳи хайру саховат ва ибодату накӯкорӣ, балки ҳамчун моҳи «даромад» ва «бо  қимамати болову бемисл фурӯхтани молҳо»-и худ мешиносанд.

Дар маркази вилояти Хатлон шаҳри Бохтар 2 бозори калонтарин мавуҷуд аст,  аммо нархҳо дар моҳи шарифи Рамазон гаронанд. Омадем ба бозори «Ҳоҷӣ Шариф» ,ки яке аз бузургтарин бозор дар кишвар аст гӯем ҳам хато намекунем. Дар ин бозор, деҳқонони минтақаи Бохтар маҳсулоти бо арақи ҷабин рӯёндаи худро аз соати 11 шаб то сӯбҳ оварда ба бозор ворид мекунанд ,лекин ҳамаи маҳсултро соҳибкорону тоҷирон шабона бо мошинҳои гаронвазн харидорӣ карда ба дигар вилоятҳои кишвар ва берун аз кишвари азиз содирот мекунанд. Ва суол мекунед,ки чаро дар фасли гармо , ки бояд ҳамаи маҳсулот разон шавад? Алббата намешавад! Чунки маҳсулоти ниёзи аввалияро берун аз кишвар содирот мекунанд!

«Президенти Ҷумҳурии Тоҷикистон пеш аз фаро расидани моҳи шарифи  Рамазон ба соҳибкорону тоҷирон такроран хотиррасон намуд, ки дар моҳи Рамазон нарху навои маҳсулотро беасос баланд бардошта, ҳамватанони худро ба азият гирифтор накунанд. Ва дар аксари кишварҳои исломӣ ва мусулмоннишин тоҷирон нархро, баръакс, дар ин моҳ арзон мекунанд, то ки бо ҳамин роҳ низ соҳиби савоб шаванд

Билохира ,нарху наво дар моҳи шарифи Рамазон,ки рӯзадорон  ба маҳсулоти аввалия ниёз доранд бамароти боло меравад. Дар бозори «Ҳоҷӣ Шариф» , ки яке аз бозорҳои яклӯхт ба ҳисоб меравад, нархи помидор 8-12 сомнӣ барои як килограмм аст,  бодиринг 3-4 сомонӣ, сабзӣ 1,50-2 сомонӣ,  картошка 2-2,50 сомонӣ, шакар 6,50 сомонӣ, себ 18-20 сомонӣ, нок 19-25 сомонӣ ,гӯшти гов 36-40 сомонӣ , 1 кг гӯшти гӯсфанд 42-45 сомонӣ, 1 халта орд 143-145 сомонӣ, қулфинай (клубник) 8-12 сомонӣ, тут 5 сомонӣ, 1 бандча кабудӣ (гашничу укроп) 1 сомонӣ фурӯхта мешавад.

Дар сӯҳбат масъулону нозирони бозорҳо иброз намуданд, ки сабаби болоравии нархҳои бозор гуногунанд. Як сабабаш афзудани содироти маҳсулоти кишварзӣ ба хориҷи кишвар мебошад. Баъд, худи деҳқонон низ маҳсулоташонро нисбат ба ҳамин давраи соли гузашта қиматтар мефурӯшанд. Деҳқонони асил баланд шудани нархи сабзавотро дар гарон шудани сӯзшивории дизелӣ ё солярка мебинанд, ки дар ҳамин мавсим сӯзишворӣ гарон мешавад.Ин дар ҳолест, ки чаро Хадамоти зиддиинҳисории Ҷумҳурии Тоҷикистон боло шудани сӯзишвориро назорат ва ба танзим намедароранд

Аксарияти нархҳо дар 2 бозори маркази вилояти Хатлон «Фаровон»-у «Ҳоҷӣ Шариф» як хеланд. Аммо дар шаҳри Левакант ва ноҳияи Кушониён боз ҳам баландтар ба назар мерасад. Дар шоҳроҳи Бохтар -Душанбе низ деҳқонони варзида ба фурӯши помидор машғуланд ва нисбати бозорҳои шаҳри Бохтар арзон мефурӯшанд.

Чаро  назорати  зидиинҳисори (антимонополия) нест!

Ҳафтаи 3-юми моҳи мубораки Рамазон ба охир мерасад ва арафаи ид наздик аст. Маълум аст,ки дар арафаи иди мубораки Рамазон тамоми кишварҳои Аврупо ва  Ғарб даст ба хайру саховату арзонии маҳсулот мекунанд, аммо 99 фисади Тоҷикистон мусалмон аст, ҳатман дар ин моҳи бузуруг бештар аз дигар моҳхо манфиат меҷӯянд? Саволест пеш аз ҳама матраҳ ба раёсати «Тоҷикматлубот»-и ҷумҳурӣ ва муассисоти зиддахли дигар.

Баҳодур Абдусалом, махсус барои Пайк

 

Ташхиси минтақаҳои "ифротихез"-и Тоҷикистон

Маркази таҳқиқоти стратегии Тоҷикистон, як ниҳоди пажӯҳишии давлатӣ минтақаҳои осебпазир ва эмини кишвар аз нигоҳи гароиши сокинонаш ба гурӯҳҳои тундравро муайян кардааст.

Масъулони ин ниҳод менависанд, минтақаҳое ҳамчун маконҳои осебпазир шинохта шудаанд, ки аз онҷо сокинонаш аз ҳама зиёд ба ҷангҳои Сурия рафтаанд. Ин аз камтарин ҳолатҳое мебошад, ки ниҳодҳои давлатии Тоҷикистон маконҳои осебпазир аз ифротгариро мушаххасан зикр мекунанд.

Мулломухтор Муллоев, як масъули Раёсати таҳлил ва ояндабинии сиёсати дохилии Маркази таҳқиқоти стратегӣ бо нашри матлабе дар ин бора навиштааст, ба минтақаҳои осебпазир маконҳое шомил мегарданд, ки нисбат ба дигар минтақаҳои ҷумҳурӣ теъдоди зиёде аз сокинонашон дар Сурия будаанд ва дар он ҷойҳо ифротгароии динӣ (пайвастан ба ҳаракатҳои «Салафия» ва «Ҳизби таҳрир») авҷ гирифтааст.

Ин масъули Маркази таҳқиқоти стратегӣ минтақаҳои осебпазири Тоҷикистон аз ифротгариро ба ин тартиб зикр кардааст:

  • Ноҳияҳои тобеи марказ – шаҳри Ваҳдат, ноҳияҳои Рӯдакӣ ва Нуробод.
  • Вилояти Суғд – шаҳрҳои Хуҷанд, Исфара, Конибодом, Истаравшан, Панҷакент, ноҳияҳои Спитамен, Ҷаббор Расулов, Ашт, Бобоҷон Ғафуров ва Мастчоҳ.
  • Вилояти Хатлон – шаҳри Кӯлоб ва ноҳияҳои Шаҳритус, Қубодиён, Бохтар, Ҷалолиддини Балхӣ, Фархор ва Восеъ.
  • Вилояти Бадахшон – ноҳияи Ванҷ (бахусус, минтақаи Язгулом).

Мулломухтор Муллоев дар матлабаш, маркази таҳқиқоти стротегӣ ҳамин ҳафта нашр кард, навиштааст, вобаста ба зиёд гардидани сафи ифротгароён ба таври амиқ минтақаҳои боқимондаи кишварро маҳалҳои ба таври мутлақ эмин номидан ғайриимкон аст. Зеро ба гуфтаи ин нафар, баъд аз пайдо гардидани раванди муҳоҷират миёни аксари ҷавонони муҳоҷир ақидаҳои ифротӣ, аз ҷумла ифротии динӣ пайдо гардидааст.

Аз ҷумла ба гуфтаи ин масъули МТС, ноҳияи Айнии вилояти Суғд қабл аз маъмул гардидани раванди муҳоҷират ноҳияи аз лиҳози амниятӣ эмин аз ифротгароӣ ба ҳисоб мерафт, вале ҳоло дар ин ноҳия низ ҳолатҳои зиёди пайвастани ҷавонон ба сафи созмони террористии ба ном “Давлати исломӣ” ва ҳаракати “Салафия” ба қайд гирифта шудааст.

Боздошти капитани артиши Русия дар Тоҷикистон

Афсари собиқи артиши Русия капитан Денис Хисамов, ки бо шиносномаи қалбакии Тоҷикистон ба Сурия рафта, дар сафи ДОИШ ҷангида буд, дар Душанбе дар боздошт қарор дорад. Хисамовро дар роҳи бозгашт аз Сурия мақомоти Туркия дастгир карда, ба Тоҷикистон супурдаанд.

Вазорати корҳои дохилии Тоҷикистон рӯзи 23 октябр хабар дод, ки мақомоти Туркия як афсари собиқи артиши Русияро ба Душанбе истирдод кардаанд ва ӯ ҳоло дар Тоҷикистон дар боздошт қарор дорад.

Далели аз Туркия на ба Русия, балки ба Тоҷикистон истирдод шудани Хисамов Денис Франгизович, санаи таваллудаш 18 декабри соли 1983, ин будааст, ки ӯ ҳангоми боздошташ дар Туркия бо худ шиносномаи қалбакии Тоҷикистонро доштааст.

Вазорати дохилаи Тоҷикистон мегӯяд, дар ҷараёни санҷиш маълум шуд, ки ин нафари аз Туркия ба Душанбе истирдодшуда дар асл на шаҳрванди Тоҷикистон, балки шаҳрванди Русия буда, соли 1982 дар шаҳри Краснодари Русия таваллуд шудааст.

Денис Хисамов маълумоти олӣ ва ҳатто унвони илмии номзади илмҳои техникиро дошт ва қаблан дар вазорати мудофиаи Русия кор мекард. Рутбаи ӯ дар артиш капитан будааст.

Аммо Денис Хисамов сипас ба ақидаҳои ифротии мазҳабӣ майл пайдо карда, моҳи майи соли 2015 барои худ "бо роҳи қалбакӣ шиносномаи шаҳрвандии Ҷумҳурии Тоҷикистонро омода намуда, тавассути ин шиноснома аз Федератсияи Россия ба Ҷумҳурии Туркия ва аз он ҷо ба гурӯҳҳои ҷинояткори Давлати исломии Ироқу Шом (ДОИШ) пайвастааст.

Бар асоси гузориши маркази матбуоти вазорати дохилаи Тоҷикистон, "Денис Хисамов дар муноқишаҳо ва ҷангҳои сарзамини Ироқу Сурия фаъолона ширкат варзида, моҳи апрели соли 2017 вақти баргаштан аз минтақаҳои ҷангзадаи Ироқу Сурия аз ҷониби кормандони милитсияи Ҷумҳурии Туркия дастгир гардида, барои шиносномаи қалбакии Ҷумҳурии Тоҷикистонро доштанаш, ба Ҷумҳурии Тоҷикистон фиристода шудааст.

Вазорати дохила меафзояд, "Хисамов Денис қасди баргаштан ба Федератсияи Россия барои содир намудани ҷиноятро доштааст.

Қаблан дар бораи истифодаи ҷангиёни ДОИШ аз шиносномаҳои қалбакии Тоҷикистон барои расондани худ ба Сурияву Ироқ ваё ҳангоми тарки он ду кишвари ҷангзада гузоришҳои зиёде нашр шуда буд.

Аммо ин барои аввалин бор аст, ки як шаҳрванди Русия ва он ҳам афсари собиқи артиш бо иттиҳоми узвият дар ДОИШ дар Тоҷикистон боздошт мешавад.

Ҳанӯз маълум нест, ки чаро Хисамов дурнамои дурахшонаш дар арсаи илм ва хидмат дар артиши Русияро канор гузошта, ба ДОИШ пайвастааст.

Зимнан, исми Денис Хисамов ва корномаи илмии вай дар сомонаи "Известные ученые” ҳамчун як олими ҷавону умедбахш зикр шудааст:

Ҳукми зиндони 9 сокини вилояти Хатлон барои таблиғи ДИ

Додгоҳи вилояти Хатлон 9 сокини маҳаллиро барои тарғиби ғояҳои гуруҳи даҳшатафкани "Давлати исломӣ" аз 5 то 20 солӣ зиндонӣ кард. Темур Бойзода, муовини раиси Додгоҳи Хатлон 24 октябр гуфт, ҳангоми баррасӣ гуноҳи маҳкумшудаҳо исбот шуд.

Ба гуфтаи як манбаъ, раҳбари гуруҳ Файзиддин Шомардонов 20 сол, Саидмурод Баротов 18 сол, Абубакр Сатторов 15 сол, Аҳрорхӯҷа Ҷононов 12 сол, Ҷамолиддин Одинаев 12 сол, Аҳадҷон Шамсиддинов 10 сол, Қобилҷон Абдулвосил 6 сол, Шарипов Азамҷон 5 сол ва Наврӯз Баротов шашуним моҳ аз озодӣ маҳрум шудаанд.

Масъулони додгоҳ мегӯянд, ин 9 нафар ба таблиғи ақидаҳои ифротӣ даст зада, ҷавонони дигарро низ ба сафи ДИ даъват мекарданд. "Файзиддин Шомардонов шахсан бо аъзои ДИ дар Ироқу Сурия тамос доштааст", - афзуд манбаъ.

Танҳо наздикони яке аз маҳкумшудаҳо - Файзиддин Сатторов, падари Абубакр Сатторов, ки 15 сол равонаи зиндон шудааст, гуфт, аз қарори додгоҳ сахт норозист ва аз болои он ба зинаи болоӣ шикоят хоҳад бурд.

"Ҳукмро рӯзи ҷумъа хондад. Хеле ҳолатам бад аст, писари маро бо туҳмат зиндонӣ карданд. Ӯ як тоҷир буд ва дар ширкати таъминкунандаи васоили гигиении кӯдакон "Royal Baby" дар маҳаллаи "Коминтерн"-и шаҳри Қӯрғонтеппа кор мекард. Аз болои ин ҳукм шикоят мекунам. Ҳоло аз ин зиёд чизе гуфта наметавонам, чун хулосаи ҳукми додгоҳро дар даст надорам, аммо ба Маҷлиси Олӣ нома навиштаам", - гуфт Сатторов.

Вазорати дифои Русия: Гулмурод Ҳалимов дар Дайр-уз-Зор кушта шуд

Вазорати дифои Русия аз кушта шудани 40 ҷангҷӯ ва фармондеҳи калидии гурӯҳи “Давлати исломӣ”, аз ҷумла Гулмурод Ҳалимов – сардори пешини ОМОН-и Тоҷикистон – дар минтақаи Дайр-уз-Зори Сурия хабар дод. Оҷонсии “Интерфакс” рӯзи 8-уми сентябр аз қавли мақомоти Вазорати дифои Русия гуфт, ки Гулмурод Ҳалимов “аз захмҳои бардоштааш” ба ҳалокат расид.

Ба навиштаи хабаргузорӣ, нирӯҳои Русия як ҷаласаи фармондеҳони гурӯҳи “Давлати исломӣ” дар Дайр-уз-Зорро ҳадаф қарор доданд, ки дар онҷо “вазири ҷанг” Гулмурод Ҳалимов низ ҳузур дошт. “Муайян карда шуд, ки Ҳалимов аз ҷароҳатҳои вазнини бардоштааш ҳалок шудааст”, - навишт “Интерфакс”.

Дар Вазорати дифои Русия гуфтаанд, онҳо рӯзи 5-уми сентябри имсол аз ҷаласаи фармондеҳони ДИИШ дар атрофи Дайр-уз-Зор хабардор шуда, баъд аз тасдиқи он тавассути ду ҳавопаймои Су-34 ва Су-35 ва бомбаҳои бетоншикан даст ба кор шуданд. Дар ин ҳамла, ба гуфтаи онҳо, Абу Муҳаммад Аш-Шимолӣ, масъули молӣ ва интиқоли ҷангҷӯёни нав ба пойгоҳи тамринотии ДИИШ низ кушта шуд.

Тасдиқи дурустии ин хабар аз манобеи дигар дар ҳоли ҳозир ғайриимкон аст. Аз ин пеш, ҳадди ақалл ду дафъа хабари марги Ҳалимов аз манобеи мухталиф пахш шуд. Бори охир моҳи апрели имсол нашрияи “Таймс” бо такя ба манобеи амниятии Ироқ хабари марги Гулмурод Ҳалимовро нашр кард.

Аммо дар моҳи август ду ҷангҷӯи гурӯҳи тундрави "Давлати исломӣ" дар ду паёми ҷудогонаи савтӣ иддао карданд, ки Гулмурод Ҳалимов, полковники фирории тоҷик, зинда аст. Парвиз Саидраҳмонов, бо лақаби "Абу Довуд" ва Тоҷиддин Назаров, бо лақаби "Абу Усомаи Норакӣ", иддао карданд, ки хабари ҳалокати Гулмурод Ҳалимов дурӯғ аст.

Гулмурод Ҳалимов, фармондеҳи дастаи таъиноти махсус ё худ ОМОН-и Вазорати корҳои дохилии Тоҷикистон моҳи апрели соли 2015 аз Тоҷикистон ғайб зад ва моҳи май бо нашри як паёми видеоӣ гуфт, ки ба ДИИШ пайвастааст. Як сол пас, моҳи феврали соли 2016 низ Ҳумайро Мирова, ҳамсари дуввуми ӯ аз Тоҷикистон фирор кард.

Аз Сурия ё зиндон Шоҳмурод барои додараш дувумиро баргузид

Додгоҳи вилояти Хатлон сокини деҳаи Меҳтари ноҳияи Данғара Ботирхон Кавраковро дар асоси шикояти бародари калониаш Шоҳмурод Кавраков ба "зархаридӣ ва ташкили созмони террористӣ" айбдор эълом ва 12,5 сол зиндонӣ кард.

Кавракови хурдӣ гӯиё дар шаҳри Москва ба тарғиби ақидаҳои гурӯҳи мамнӯи "Давлати исломӣ" ва ҷалби ҷавонон ба ҷангҳои Ироқу Сурия машғул будааст.

Бародараш Шоҳмурод, ки ҳамроҳи ӯ дар Русия кор мекард, баъди бозгашт ба ватан дар ин бора ба раиси ҷамоат ва муфаттишони додситонии ноҳияи Данғара хабар додааст.

Дар натиҷа, Ботирхони 33-сола 14 январи соли равон, баъди ду рӯзи бозгашташ ба ватан дар асоси баёноти бародараш боздошт ва аз рӯи се банд (ташкили фаъолияти созмони экстремистӣ), (хабар надодан дар бораи ҷиноят) ва (зархаридӣ)-и Кодекси ҷиноии Тоҷикистон гунаҳгор эълом шудааст.

Мақомот мегӯянд, Ботирхон баъди боздошт эътироф кард, ки мехост, пеш аз сафар ба Сурия падару модарашро бубинад. Худи маҳкумшуда дар додгоҳ танҳо аз рӯи як модда -- “ташкили фаъолияти созмони экстремистӣ” гуноҳро ба гардан гирифта, айбҳои дигарро рад намудааст.

Ба гуфтаи додраси парванда Ғиёсиддин Мирзода, Ботирхон Кавраков аз соли 2015 ба ин сӯ дар Москва ҳамроҳи ду ҳамватани худ, аз ҷумла як ҳамсинфаш бо даъвати муҳоҷирон ба ҷангҳои Сурия ва Ироқ машғул будааст.

Страница 1 из 3

Суроғаи мо:

Joomla ru